काठमाडौं– काठमाडौं निर्वाचन क्षेत्र नम्बर ४ बाट नेकपा (एमाले) का उम्मेदवार डा. राजन भट्टराईले निर्वाचन परिणामलाई पूर्ण सम्मानका साथ स्वीकार गरेको बताएका छन्।

भट्टराईले मतदाताको विश्वास जित्न नसकेको स्पष्ट गर्दै विजयोन्मुख उम्मेदवार राष्ट्रिय स्वतन्त्र पार्टीका पुकार बमलाई बधाई दिएका छन्।

उनले निर्वाचनमा सहयोग, समर्थन र साथ दिएका पार्टी कार्यकर्ता, समर्थक र जनसमुदायप्रति आभार व्यक्त गरेका छन्। यो क्षेत्रबाट नेपाली कांग्रेसका गगन थापा सर्लाही ४ मा झर्दा पनि भट्टराई तेस्रो पटक पराजित हुन पुगे ।

विगतका दुई निर्वाचनमा उनी कांग्रेस नेता गगन थापासँग पराजित भएका थिए । तेस्रो पटक यही क्षेत्रबाट चुनावी मैदानमा उत्रिएका उनी रास्वपाका पुकार बमसँग पराजित भए । उनी निकटतम् प्रतिद्वन्द्वी पनि हुन सकेनन् ।

भट्टराईले राजनीतिमा पराजय अन्तिम सत्य नभएको उल्लेख गर्दै यसलाई आत्मसमीक्षा र नयाँ पाठ सिक्ने अवसरका रूपमा लिने बताए। उनले आत्मसमीक्षा, सुधार र जनतासँगको सम्बन्ध सुदृढ पार्दै भविष्यमा फेरि विश्वास जित्ने विश्वास व्यक्त गरेका छन्।

उनले आफ्नो व्यक्तिगत निर्णय सार्वजनिक गर्दै आगामी कुनै पनि निर्वाचनमा उम्मेदवार नबन्ने जानकारी पनि मतदातालाई दिएका छन्।