काठमाडौं- लामो समयदेखि आफूलाई तराई-मधेशबासीको ठेकेदारका रुपमा चिताउँदै आएका विभिन्न दलका नेताहरू फागुन २१ को प्रतिनिधिसभा सदस्य निर्वाचनमा पराजित हुने दिशामा पुगेका छन् ।

प्रारम्भिक मतगणनाअनुसार जनता समाजवादी पार्टी नेपालका अध्यक्ष उपेन्द्र यादव, राष्ट्रिय मुक्ति पार्टीका नेता राजेन्द्र महतो, आम नता पार्टीका प्रभु साह लगायतका धेरै मधेशवादी नेता पराजित हुने देखिएको हो ।

प्रारम्भिक मतगणनाअनुसार सर्लाही २ का उम्मेदवार राष्ट्रिय मुक्ति पार्टीका अध्यक्ष राजेन्द्र महतो प्रतिस्पर्धाको तेस्रो स्थानमा छन् । मतगणनाअनुसार रास्वपाका रविन महतोले ४ हजार ४०६ मत ल्याउँदा तेस्रो स्थानका राजेन्द्र महतोले जम्मा ५६८ मत मात्रै ल्याएका छन् ।

सप्तरी ३ मा उम्मेदवार जनता समाजवादी पार्टीका अध्यक्ष यादव पनि चुनावी प्रतिस्पर्धामा पछाडि देखिएका छन् । प्रारम्भिक मतगणनामा उक्त क्षेत्रमा रास्वपाका अमरकान्त चौधरीले १ हजार २०४ मत ल्याउँदा यादवले ९७८ मत ल्यार पछ्याइरहेका छन् ।

माओवादी राजनीति छाडेर आफैँ मधेशको आधारलाई टेक्दै पार्टी निर्माण गरेका प्रभु साह पनि यसपटकको निर्वाचनमा पछाडि परेका छन् । रौतहट ४ का उम्मेदवार साह प्रारम्भिक मतगणनाअनुसार पाँचौँ स्थानमा छन् ।

जनता समाजवादी पार्टीका गोविन्द चौधरीले १८५ मत ल्याउँदा पाँचौँ स्थानमा रहेका साहले जम्मा २६ मत मात्रै ल्याएका छन् । उता तराई मधेश लोकतान्त्रि पार्टी हुँदै जसपामा मिसिएका महन्थ ठाकुर भने राष्ट्रिय सभामा गएर आफ्नो अस्तित्व जोगाउन सफल भएका छन् ।

त्यस्तै, पछिल्लो समयमा मधेशवादी राजनीतिबाट केन्द्रीय राजनीतिमा पकड जमाउँदै आएका हृदयश त्रिपाठी पनि पछाडि पर्ने देखिएको छ । पश्चिम नवलपरासी १ का उम्मेदवार त्रिपाठी प्रारम्भिक मतगणनामा चौथो स्थानमा छन् ।

जनमत पार्टीका अध्यक्ष डा. सीके राउत उम्मेदवार रहेको सप्तरी २ मा शुक्रबार अबेरसम्म मतगणना सुरुवात भएको छैन । तर, उनीसम्बद्ध पार्टीका अधिकांश उम्मेदवार जितको दौडबाट परै छन् ।

यसका साथै, मधेशवादी राजनीतिमा लामो समयदेखि पकड जमाउँदै आएका अन्य धेरै नेता पनि यसपटको निर्वाचनमा जित दौडबाट बाहिर रहेको प्रारम्भिक मतगणनाको नतिजाले देखाएको छ ।