काठमाडौं– गतिशील लोकतान्त्रिक पार्टी (गलोपा) स्थापनामा महत्वपूर्ण भूमिका खेलेको बुद्ध एयरका मालिक विरेन्द्रबहादुर बस्नेतले उक्त पार्टी छाडेका छन् । फागुन २१ गते भएको प्रतिनिधिसभा सदस्यको निर्वाचनमा गलोपाले प्रतिस्पर्धात्मक अवस्था नै कायम गर्न नसकेपछि बस्नेतले पार्टी छाडेका हुन् । 

बस्नेतले सामाजिक सञ्जाल फेसबुकमा हालको राजनीतिक संस्कारले आफ्नो आत्मासँग मेल नखाएको उल्लेख गरेका छन् ।

 ‘हालको राजनीतिक संस्कारले मेरो आत्मासँग मेल खाएन । मैले बुझेँ – पद र दलको सीमाभित्र रहेर मेरो अनुभव, क्षमता र देशप्रतिको अथाह प्रेमले खोजेको योगदान दिन सकिँदैन । अबको बाटो फरक छ, तर देशप्रतिको समर्पण यथावत् छ ।’, उनले लेखेका छन् ।

उनले आगामी दिनमा एक स्वतन्त्र, जिम्मेवार नागरिकका रूपमा समाजसेवी अभियानमार्फत मातृभूमिको सेवामा समर्पित हुने पनि बताएका छन् ।