काठमाडौं- काठमाडौं क्षेत्र नम्बर १ मा पराजित भएका राष्ट्रिय प्रजातन्त्र पार्टीका वरिष्ठ नेता रवीन्द्र मिश्रले विजयी उम्मेदवार राष्ट्रिय स्वतन्त्र पार्टीकी रञ्जु दर्शनालाई बधाई दिएका छन्।

मिश्रले सामाजिक सञ्जाल फेसबुकमार्फत दर्शनालाई बधाई तथा शुभकामना दिएका हुन्। उनले करिब १०/११ वर्षअघि दर्शनाको फोटोसहितको लेख शेयर गर्दै उनको प्रशंसा र भविष्यप्रति आशा व्यक्त गरेको स्मरण पनि गरेका छन्।

‘आज पुनः त्यही फोटो प्रेषित गरेर तपाईंलाई बधाई तथा शुभकामना दिन चाहन्छु,’ उनले लेखेका छन्, ‘भ्रष्टाचार नियन्त्रण, सुशासन र रूपान्तरणप्रतिको तपाईंको इमान र दृढता सदा कायम रहोस्।’

काठमाडौं–१ को निर्वाचन परिणाममा रञ्जु विजयी हुँदा रवीन्द्र तेस्रो पटक पराजित भएका हुन्। उनी यसअघि नेपाली कांग्रेसका प्रकाशमान सिंहसँग दुई पटक पराजित भएका थिए ।