काठमाडौँ- भक्तपुर निर्वाचन क्षेत्र नम्बर १ को प्रारम्भिक मतगणनामा राष्ट्रिय स्वतन्त्र पार्टी (रास्वपा) का उम्मेदवार रुकेश रन्जितले ठुलो अन्तरले अग्रता लिएका छन्। निर्वाचन अधिकृतको कार्यालयले सार्वजनिक गरेको पछिल्लो विवरण अनुसार रन्जितले ८८८ मत प्राप्त गर्दै प्रतिस्पर्धीहरूलाई निकै पछि पारेका हुन्।

उनलाई नेपाली कांग्रेसका उम्मेदवार किरण न्यौपानेले पछ्याइरहेका छन्। न्यौपानेले हालसम्म २३५ मत प्राप्त गरेका छन्। भक्तपुरको यो क्षेत्रमा परम्परागत रूपमा बलियो मानिएको नेपाल मजदुर किसान पार्टीका उम्मेदवार प्रेम सुवाल भने सुरुवाती चरणमा केही पछि देखिएका छन्। सुवालले हालसम्म ७५ मत मात्रै प्राप्त गरेका छन्।

त्यस्तै, राष्ट्रिय प्रजातन्त्र पार्टीका उम्मेदवार भरत बहादुर खड्काले ६१ मत र नेकपा (एमाले) का उम्मेदवार सोम प्रसाद मिश्रले ५९ मत प्राप्त गरेका छन्। नेपाली कम्युनिष्ट पार्टीका उम्मेदवार हरि राम लवजूको पक्षमा भने ११ मत परेको छ।