बर्दिया- प्रतिनिधिसभा निर्वाचनका क्रममा बर्दियामा करिब ६१ प्रतिशत मतदान भएको छ । बर्दिया जिल्लाभरिबाट एक लाख ९७ हजार १९९ जनाले मतदान गरेको जिल्ला निर्वाचन कार्यालयले जनाएको छ ।

निर्वाचन क्षेत्र नं १ मा एक लाख दुई हजार ८३६ जनाले मतदान गरेका छन् । त्यसैगरी, क्षेत्र नं २ मा ९४ हजार ३६३ जनाले मतदान गरेको निर्वाचन कार्यालयले जनाएको छ ।

बर्दिया जिल्लामा तीन लाख २३ हजार २६६ जना मतदाता छन् । बर्दिया जिल्लाभरि १५४ वटा मतदानस्थलमा ३८७ वटा मतदान केन्द्र रहेका छन् भने जिल्लाभरि दुई स्थानमा अस्थायी मतदान केन्द्र रहेका छन् ।

निर्वाचन क्षेत्रबाट मतपेटिका सङ्कलन गर्ने कार्य भइरहेको मुख्य निर्वाचन अधिकृत मनोज श्रेष्ठले बताए ।