काठमाडौं- भक्तपुरको नलिञ्चोकस्थित हेलिपोर्ट निर्माणमा भएको भ्रष्टाचार मुद्दामा थुनामा परेका नेपाल नागरिक उड्ययन प्राधिकरणका निलम्बित महानिर्देशक प्रदीप अधिकारीलाई सर्वोच्च अदालतले पनि थुनामुक्त गर्न अस्वीकार गरेको छ ।

न्यायाधीशद्वय हरिप्रसाद फुयाल र शान्तिसिंह थापाको संयुक्त इजलासले क्यानका निलम्बित महानिर्देशक अधिकारीलाई धरौटीमा थुनामुक्त गर्न शुक्रबार अस्वीकार गरेको हो ।

यससँगै महानिर्देशक अधिकारीले थुनामै बस्नुपर्ने भएको छ। विशेष अदालतको आदेशसँगै उनी अहिले डिल्ली बजार कारागारमा पुर्पक्षका लागि थुनामा छन् ।

विशेषले थुनामा पठाउने गरी यसअघि दिएको आदेशलाई सर्वोच्चले सदर गरेसँगै अधिकारीको जेल बसाइ लम्बिएको छ।  

गत मंसिर २१ गते उनलाई विशेष अदालतका न्यायाधीशहरू हेमन्त रावल, डिल्लीरत्न श्रेष्ठ र विदुर कोइरालाको संयुक्त इजलासले थुनामा राख्न आदेश दिएको थियो। विशेषको उक्त आदेशविरुद्ध अधिकारी गत पुस २१ गते सर्वोच्च गएका थिए ।

भक्तपुरको नालिन्चोक हेलीप्याड निर्माणको  क्रममा भ्रष्टाचार गरेको आरोपमा अख्तियार दुरुपयोग अनुसन्धान आयोगले १३ करोड ५७ लाख बिगो दाबीसहित मुद्दा दायर गरेको थियो ।

अख्तियारले अधिकारीसहित क्यानकै पूर्वनिर्देशक मुरारी भण्डारीलाई पनि बुधबार नियन्त्रणमा लिएर विशेष अदालतमा उपस्थित गराएको थियो । अधिकारीले पोखरा विमानस्थल निर्माणमा भएको हिनामिना प्रकरणमा भने धरौटीको राहत पाएका छन् ।