काठमाडौं- एपस्टिन फाइलमा तिब्बती धर्मगुरु दलाई लामाको नाम पनि मुछिएको छ । अमेरिकी न्याय मन्त्रालयले सार्वजनिक गरेको फाइलमा लामाको नाम १ सय ६९ पटक उल्लेख छ ।

एपस्टिन फाइलमा दलाई लामाको नाम सबैभन्दा धेरै पटक अमेरिकाको प्रतिष्ठित विश्वविद्यालय मासाचुसेट्स इन्स्टिच्युट अफ टेक्नोलोजी एमआईटीका एक जना पूर्वअधिकारीले गरेका छन् । चिनियाँ राज्यसञ्चालित टेलिभिजन सञ्जाल सीजीटीएनले दिएको जानकारी अनुसार उक्त फाइलमा एमआईटीको मिडिया ल्याबका पूर्वनिर्देशक जोइची इटोले उनको नाम सबैभन्दा धेरैपटक उल्लेख गरेका छन् ।

एपस्टिनबाट १७ लाख डलर सहयोग प्राप्त गरेको खुलासा भएपछि इटोले सन् २०१९ मा राजीनामा दिएका थिए ।

एपस्टिन फाइलमा उल्लेख भएअनुसार दलाई लामाले कुख्यात बालयौन दुराचारी जेफ्री एपस्टिनसँग भेट गरेको पनि संकेत मिलेको छ । सन् २०१२ को अक्टोबर महिनामा आदानप्रदान भएको इमेलमा दलाई लामाले एपस्टिनसँग भेट गरेको सन्दर्भ उल्लेख छ ।

त्यसबाहेक अन्य एक कार्यक्रममा पनि दलाई लामा एपस्टिनसँगै सहभागी हुने सन्दर्भ उल्लेख छ । त्यस्तै, दलाई लामा निकट व्यक्तिहरुले पनि एपस्टिनसँग भेट गरेको दाबी गरिएको छ ।

गत वर्ष माइकल उल्फ नाम गरेका पत्रकारले न्यूयोर्कको म्यानहटनमा रहेको एपस्टिनको भवनमा एपस्टिनसँग दलाई लामा र अन्य महत्वपूर्ण व्यक्तिहरुलाई साथै देखेको दाबी गरेका थिए । एक पडकास्टका क्रममा उनले दलाई लामाले वित्तीय सहयोग वा परोपकारी कामका लागि उनी त्यहाँ पुगेको हुनसक्ने उल्लेख गरेका थिए ।