काठमाडौं- नेपाली कम्युनिस्ट पार्टीका संयोजक पुष्पकमल दाहाल प्रचण्डले राष्ट्रिय स्वतन्त्र पार्टीका सभापति रवि लामिछाने र काठमाडौं महानगरपालिकाका मेयर बालेन्द्र साहको गठबन्धनबाट नडराएको बताएका छन् ।

मंगलबार पेरिसडाँडामा सञ्चारकर्मीहरूसँगको छोटो कुराकानीका क्रममा उनले रवि र बालेनसँग आफूहरू डराउनुपर्ने कुनै कारण नभएको पनि बताए ।

‘उहाँहरूसँग डराउनुपर्ने कुनै कारण छैन । हामी रवि र बालेनको गठबन्धनबाट डराएका छैनौँ’, उनले भने, ‘उहाँहरूसँग हामी किन डराउने ? छैन, मलाई केही पनि डर छैन ।’

उनले रविलाई विगतमा आफूले अत्यन्त अप्ठ्यारो अवस्थामा साथ दिएको पनि स्मरण गरेका छन्।

‘रविलाई धेरै अप्ठ्यारो स्थितिबाट मैले डिफेन्ड गर्दै आएको हो । मैले उनलाई अप्ठ्यारोमा साथ दिएको हो’, उनले भने, ‘मेरै सरकारमा मैले दुई‍-दुई पटक उनलाई गृहमन्त्री पनि बनाएको हो ।’

फरक प्रसंगमा प्रचण्डले माघ ११ गते हुन लागेको राष्ट्रियसभा निर्वाचनमा तीनवटा सदस्य लिने सहमति नभएको बताएका छन्।

‘छैन, कहीँ कतै सहमति भएको छैन । राष्ट्रियसभामा जसको मतभार जति छ, त्यहीअनुसार सिट पाउने अधिकार हो । हामीसँग कुनै सहमति भइसकेको छैन । हामीले तीन सिट लिने कुराको टुंगो भएको छैन ।’