काठमाडौं- नेकपा एमालेका अध्यक्ष केपी शर्मा ओलीले आफूलाई चुनौती दिने नेताहरूलाई एकपछि अर्को गर्दै पाखा लगाइरहेका छन् ।

उनले मंगलबार बसेको सचिवालय बैठकमा पनि त्यसलाई निरन्तरता दिए । उनले आफूसँग प्रतिस्पर्धा गरेका तत्कालीन वरिष्ठ उपाध्यक्ष ईश्वर पोखरेलको जिम्मेवारी पनि खोसेका छन् ।

पोखरेलले सम्हाल्दै आएको नीति तथा अनुसन्धान प्रतिष्ठानको प्रमुखको जिम्मेवारी ओलीले खोसेका हुन् । उक्त जिम्मेवारी खोसेर उपमहासचिव र केन्द्रीय सदस्यमा पनि पराजित आफ्ना सहयोगी विष्णु रिमाललाई ओलीले दिएका छन् ।

अध्यक्ष ओलीले पोखरेलको जिम्मेवारी खोस्दै दुवै पदमा अस्वीकृत रिमाललाई दिएका हुन् । ओलीले मंगलबार नै उपाध्यक्ष रामबहादुर थापा बादल नेतृत्वको निर्वाचन परिचालन समितिको सचिव पनि रिमाललाई नै बनाएका छन् ।

एमालेमा साधारण कार्यकर्ताको हैसियत भए पनि ओलीले रिमाललाई पदाधिकारीकै हैसियतमा दोहोरो तेहेरो जिम्मेवारी दिएका हुन् । बैठकमा ओलीले यो प्रस्ताव गरेपछि सचिवालयका केही सदस्यले असन्तुष्टि जनाएका थिए।

तर अध्यक्ष ओलीले निकै लामो समय पार्टीमा सक्रिय रहेको र युवा भएका कारण रिमाललाई जिम्मेवारी दिनुपर्ने अडान राखे । त्यसपछि पोखरेलको जिम्मेवारी खोसिएको हो।

यसअगाडि भएको एमालेको एघारौं महाधिवेशनमा रिमाल केन्द्रीय सदस्य र उपमहासचिवमा पराजित भएका थिए। पोखरेल केन्द्रीय सदस्यमा विजय भए पनि अध्यक्षमा ओलीसँग पराजित भए ।

बैठकमा सहभागी एकजना सचिवालय सदस्यले खबरहबलाई दिएको जानकारी अनुसार भर्खरै अध्यक्षमा पराजित पोखरेलसँग सहकार्य भन्दा निरुत्साहित गर्ने नीति ओलीले लिएका छन् ।

सचिवालयका केही सदस्यले रिमाललाई दिने भूमिकाबारे प्रश्न गरे । तर ओलीले त्यसको प्रतिवाद गर्दै रिमाल केन्द्रीय सदस्य र अन्य जिम्मेवारीमा नरहेकाले नयाँ भूमिका कुशलतापूर्वक निर्वाह गर्न सक्ने जवाफ दिए ।

‘हामीले पोखरेल कमरेडको जिम्मेवारी खोस्नु हुँदैन, उहाँसँग ठूलो पार्टी पंक्ति छ भनेका थियौँ । तर हाम्रो कुराको सुनवाइ भएन’, बैठकमा सहभागी सचिवालय सदस्यले भने, ‘अध्यक्ष कमरेडले पेलेरै निर्णय गर्नुभयो । उहाँले पेलेपछि सबैजना चुप लागे ।’

नीति तथा अनुसन्धान प्रतिष्ठानको जिम्मेवारी खोसेर पोखरेललाई घोषणापत्र मस्यौदा कमिटी सदस्य बनाइएको छ। फागुन २१ को चुनावका लागि बनाइएको उक्त समितिमा ओली आफैं संयोजक छन्।