काठमाडौँ – नेपाल पञ्चाङ्ग निर्णायक विकास समितिले यस वर्षको बडादसैँको टीकाको उत्तम साइत कात्तिक ४ गते बुधबार बिहान १०:२६ बजे रहेको जनाएको छ।

विजयादशमीका दिन बिहान ८:४९ बजे देवी विसर्जन गरेपछि उक्त साइतमा टीका लगाउनु उत्तम हुने समितिले जनाएको छ। टीका लगाइदिने र लगाइमाग्ने व्यक्ति पश्चिम मोहडा फर्किनुपर्नेछ।

समितिका अनुसार असोज २५ गते आइतबार नवरात्रारम्भ तथा घटस्थापना गरिनेछ। घटस्थापनाको शुभसाइत बिहान ११:४७ बजे रहेको छ।

त्यस्तै, असोज २६ गते सोमबार बिहान १०:०७ बजे पश्चिम मोहडा फर्काएर झण्डा फेर्ने शुभसाइत छ। असोज २९ गते बिहीबार श्रीपचलीभैरव यात्रा र असोज ३१ गते शनिबार फूलपाती परेको छ। फूलपातीका दिन श्री तुलजाभवानी यात्राको साइत बिहान ७:३७ बजे र स्थिरासनको साइत बिहान १०:३९ बजे रहेको छ।

कार्तिक १ गते आइतबार महाष्टमी तथा कालरात्रि मनाइनेछ भने कार्तिक ३ गते मंगलबार महानवमी परेको छ। विजयादशमीका दिन टीकाको साइतका साथै श्री तुलजाभवानी यात्राको साइत बिहान १०:५१ बजे र स्थिरासनको साइत दिवा ११:५२ बजे रहेको छ। सोही दिन खड्गयात्रासमेत हुनेछ।

समितिका अनुसार कार्तिक ८ गते आइतबार अखिलबलिपूर्ति तथा कोजाग्रत पूजा गरेपछि यस वर्षको नवरात्र तथा दसैँ समापन हुनेछ।