काठमाडौं– संसदीय सुनुवाई समितिले बिभिन्न १३ देशमा सिफारिस भएका प्रस्तावित राजदूतहरुको संसदीय सुनुवाइ असोज २६ देखि २८ गतेसम्म गर्ने निर्णय गरेको छ ।  

सिंहदरबारमा मंगलबार बसेको समितिमा प्रस्तावित राजदूतहरुबिरुद्ध परेका उजुरीहरु समिति सदस्यहरुलाई अध्ययनका लागि बितरण गर्र्दै असोज २६ देखि २८ गतेसम्म सुनुवाई गर्ने निर्णय गरेको सभापति बोधनारायण श्रेष्ठले जानकारी दिए । 

संसदीय सुनुवाइ प्रक्रियालाई थप प्रभावकारी बनाउन र उजुरीहरूको अध्ययन गर्नका लागि सांसदहरूलाई केही दिन समय दिइएको उनले बताए । 

समितिमा प्रस्तवित राजदूतहरुबिरुद्ध ७ वटा उजुरी परेका छन् । जसमध्ये १३ जना बिरुद्ध एउटा उजुरी, भारतका लागि प्रस्तावित राजदूत निश्चलनाथ पाण्डेबिरुद्ध १ उजुरी, साउदी अरेबियाका लागि प्रस्तावित राजदूत गिरी बहादुर सुनार बिरुद्ध २ वटा उजुरी र जापानका लागि प्रस्तावित राजदूत जिज्ञानकुमार थापा बिरुद्ध ३ वटा उजुरी परेको सभापति श्रेष्ठले बताए ।

असोज २ गते बसेको मन्त्रिपरिषद् बैठकले १३ देशका राजदूतको लागि विभिन्न व्यक्तिको नाम सिफारिस गरेको थियो ।