काठमाडौं – भोटेकोशी हुँदै त्रिशूली नदीमा आएको भीषण बाढीका कारण नुवाकोट कारागारको पर्खाल र गेट तोडेर केही कैदीबन्दी भागेको र उनीहरूलाई नियन्त्रणमा लिने क्रममा सुरक्षाकर्मीमाथि समेत आक्रमण भएको खुलेको छ ।

प्रधानमन्त्री बालेन्द्र शाहले आइतबार सामाजिक सञ्जालमार्फत सार्वजनिक गरेको विवरणअनुसार बाढीको मौका छोपेर करिब ५० जना कैदीबन्दी कारागारबाट भागेका थिए । उनीहरू करिब १०० मिटरसम्म बाहिर पुगिसकेपछि सुरक्षाकर्मीले पुनः नियन्त्रणमा लिएका थिए ।

भागेका कैदीबन्दीलाई नियन्त्रणमा लिने क्रममा केही सुरक्षाकर्मी घाइतेसमेत भएका थिए । प्रधानमन्त्री शाहका अनुसार भाग्न नसकेका केही कैदीबन्दीले समेत सुरक्षाकर्मीमाथि आक्रमण गरेका थिए ।

नुवाकोटको विदुर नगरपालिका–६, खम्पा क्याम्पमा रहेको केन्द्रीय कारागारमा बाढी आउँदा ९२३ जना कैदीबन्दी रहेका थिए । त्रिशूली नदीमा पानीको सतह बढ्दै गएपछि कारागारको सुरक्षार्थ खटिएका नेपाल प्रहरी र सशस्त्र प्रहरी बलका कमान्डरसहित ५२ जना सुरक्षाकर्मीले तत्काल उद्धारको पहल गरेका थिए ।

बाढीले कारागार आसपासका संरचनामा क्षति पुर्‍याउन थालेपछि सुरक्षाकर्मीले दुईवटा भवनमा रहेका सबै कैदीबन्दीलाई तुलनात्मक रूपमा सुरक्षित मानिएको माथिल्लो भवनमा सारेका थिए ।

त्यतिबेलासम्म त्रिशूली नदीको तटीय क्षेत्रमा रहेको कारागारको प्रशासनिक भवन, सुरक्षा हाइपोष्ट र पर्खालमा बाढीले क्षति पुर्‍याइसकेको थियो। कैदीबन्दी राखिएको भवनको पहिलो तलासम्म समेत लेदोसहितको बाढी प्रवेश गरिसकेको थियो ।

कारागारको संरचना नै जोखिममा परेको अवस्थामा कैदीबन्दीलाई सुरक्षित स्थानमा सार्नुका साथै कारागारबाट भागेका कैदीबन्दीलाई नियन्त्रणमा लिनुपर्ने दोहोरो चुनौती सुरक्षाकर्मीमाथि आएको थियो ।

प्रधानमन्त्री शाहले विपद्को यस्तो कठिन परिस्थितिमा सुरक्षाकर्मीले कैदीबन्दीको सुरक्षासँगै आसपासका स्थानीय बासिन्दाको ज्यान जोगाउनसमेत महत्वपूर्ण भूमिका निर्वाह गरेको बताएका छन् ।

उनले भोटेकोशी–त्रिशूली बाढीका बेला सुरक्षाकर्मीले देखाएको साहसलाई उदाहरणीय भन्दै प्रशंसा गरेका छन् । बाढीले ठूलो क्षति पुर्‍याइरहेका बेला समेत सुरक्षाकर्मीले आफ्नो ज्यानको जोखिम मोलेर नागरिक तथा कैदीबन्दीको उद्धार र सुरक्षामा खटिएको उनको भनाइ छ ।

भदौ १० गते भोटेकोशी नदीमा आएको विनाशकारी बाढीले रसुवाबाट नुवाकोट हुँदै त्रिशूली नदी आसपासका क्षेत्रमा ठूलो क्षति पुर्‍याएको थियो। सोही बाढीका क्रममा केन्द्रीय कारागारसमेत उच्च जोखिममा परेको थियो ।