काठमाडौं- प्रधानमन्त्री वालेन्द्र शाह संयुक्त राष्ट्रसङ्घको महासभामा भाग लिन जाने भएका छन् । यसअगाडि उनले आफू महासभामा नगएर परराष्ट्रमन्त्री शिशिर खनाललाई पठाउने निर्णय गरेका थिए ।

तर भदौ १० गते भोटेकोशीमा ठूलो बाढी आएर अकल्पनीय मानवीय र भौतिक क्षति भएपछि वालेन्द्रलाई राष्ट्रसंघमा गएर आफैं कुरा राख्न दवाब परेको थियो ।

उक्त दबाबबीच प्रधानमन्त्री शाहले महासभामा आफू पनि जाने निर्णय लिएका हुन् । उनको साथमा परराष्ट्रमन्त्री शिशिर खनाल पनि हुनेछन्।

परराष्ट्र मन्त्रालय स्रोतका अनुसार महासभामा प्रधानमन्त्री जाने भएपछि तयारी थालिएको छ । ‘प्रधानमन्त्रीसँगै परराष्ट्रमन्त्री पनि महासभामा जानुहुन्छ, तयारी गरिरहेका छौँ। विभिन्न विज्ञसँग परमार्शपछि सम्बोधन र नेपालले उठाउने विषय तय हुँदैछ’, परराष्ट्रका अधिकारीले भने, ‘प्रधानमन्त्री र परराष्ट्र मन्त्री र सानो टोली लिएर जानु हुनेछ। ’

ती अधिकारीका अनुसार जलवायु परिवर्तनको संकट र कार्बन उत्सर्जनका कारण नेपालले भोगिरहेको समस्या प्रधानमन्त्रीले राष्ट्रसंघमा राख्नेछन् ।

भोटेकोशी बाढीको क्षतिलाई नै मुख्य मुद्दा बनाएर नेपालले राष्ट्रसंघमा कुरा राख्ने भएको छ। परराष्ट्र मन्त्रालयका अनुसार प्रधानमन्त्री महासभामा जाने टुंगो दुई दिनअघि लागेको हो ।

सुरुमा प्रधानमन्त्री नजाने भएपछि विपक्षीसँगै मिडिया र विज्ञले पनि दबाब दिएका थिए । प्रधानमन्त्री शाहलाई रास्वपा सभापति रवि लामिछानेले पनि महासभामा जान भनेका छन् ।

प्रधानमन्त्री शाह सहभागी हुने महासभाको कार्यक्रम सेप्टेम्बर ८ देखि न्यूयोर्कमा सुरू हुनेछ। प्रधानमन्त्रीको यो पहिलो विदेश भ्रमण पनि हुनेछ। छिमेकी मुलुक भारत र चीनसमेत नगई उनी अमेरिका र राष्ट्रसंघमा जान लागेका हुन् । अब उनीमाथि नेपालले जलवायु परिवर्तनबाट भोगिरहेको मुद्दा स्थापित गर्ने दबाब छ।

संयुक्त राष्ट्रसङ्घको औपचारिक अधिवेशन ८ सेप्टेम्बरमा सुरु भए पनि उच्चस्तरीय बहस २२ सेप्टेम्बरदेखि २८ सेप्टेम्बर २०२६ सम्म चल्नेछ। त्यही समयमा वालेन्द्रले सम्बोधनको अवसर पाउनेछन्।