काठमाडौं- सरकारले विदेशस्थित नेपाली नियोगहरूलाई प्रधानमन्त्री दैवी प्रकोप उद्धार कोषमा सहयोग पुर्‍याउनेका लागि छुट्टै बैंक खाता चलाउन निर्देशन दिएको छ।

कोषमा प्रत्यक्ष सहयोग रकम पठाउन सम्भव नभएको वा तोकिएको कारोबार सीमाभन्दा बढी रकम पठाउँदा झन्झट हुने देखिएकाले अन्य खाता प्रयोग गर्न भनिएको परराष्ट्र मन्त्रालयले जनाएको छ।

‘विद्यमान नियमअनुसार आफ्ना विविध खाता प्रयोग गर्न वा नयाँ खाता खोल्न निर्देशन दिइएको छ। यी खातामार्फत नेपाली डायस्पोरा, विदेशी नागरिक, स्थानीय संघसंस्था तथा सामुदायिक समूहहरूबाट राहत सहयोग रकम संकलन गरिनेछ,’ परराष्ट्र मन्त्रालयले भनेको छ।

अब नियोगहरूले तोकिएको ढाँचामा जम्मा भएको रकमको दैनिक अभिलेख राख्नुपर्ने भएको छ। संकलित रकम प्रत्येक महिना तोकिएको राहत खातामा स्थानान्तरण गर्नुपर्ने नियम राखिएको छ। अहिलेसम्म सरकारले दैवी प्रकोप उद्धार कोषको खातामा रकम जम्मा गर्न सकिने व्यवस्था मिलाएको थियो।

मन्त्रालय तथा विदेशस्थित नेपाली नियोगहरूले सबै मित्रराष्ट्रसँग निकट समन्वय गरी यात्रा सम्बन्धी सूचना बाढीबाट प्रभावित विशेष क्षेत्रहरूमा मात्र सीमित राख्ने प्रयास गरिरहेको पनि जानकारी दिएका छन्।

‘देशका अन्य क्षेत्रहरू यात्रा तथा पर्यटनका लागि खुला र सुरक्षित रहेको विषयलाई पनि स्पष्ट रूपमा उजागर गरिँदैछ,’ मन्त्रालयले आइतबार उल्लेख गरेको छ।