काठमाडौं– नेपाल आदिवासी जनजाति महासंघ अन्तर्राष्ट्रिय विश्व आदिवासी दिवस सप्ताहव्यापी रुपमा मनाइने भएको छ ।  

महासंघले बिहीबार काठमाडौंमा पत्रकार सम्मेलन गर्दै विश्वभरिका आदिवासी समुदायद्वारा प्रत्येक वर्ष अगस्त ९ तारिखका दिन मनाइँदै आएको अन्तर्राष्ट्रिय विश्व आदिवासी दिवस नेपालमा सप्ताहव्यापी रुपमा मनाइने जनाएको हो । 

श्रावण २४ गते, आइतबारका दिन मूल समारोहको आयोजना गरिने महासंघका महासचिव विमल सारु मगरले जानकारी दिए ।

महासंघले यो वर्ष ‘प्राप्त अधिकारको रक्षा आजको आवश्यकता: पहिचानसहितको समावेशी र न्यायपूर्ण नेपाल निर्माणमा हाम्रो साझा प्रतिबद्धता’ भन्ने मूल नारा तय गरेको छ ।

नेपालका आदिवासी जनजातिहरूले आफ्नो भाषा, संस्कृति, सभ्यता, परम्परागत ज्ञान प्रणाली, प्राकृतिक स्रोतहरूको सम्बन्ध, भूमि अधिकार, समानुपातिक समावेशी सहभागिता, सामाजिक न्याय तथा पहिचानका सवालहरूलाई राष्ट्रिय तथा अन्तर्राष्ट्रिय समुदायसमक्ष सशक्त रूपमा उठाउने अवसरका रूपमा दिवसलाई मनाउँदै आएको महासचिव मगरले बताए । 

यस दिवसले नेपालको विविधता, सहअस्तित्व, सामाजिक सद्भाव र राष्ट्रिय एकतालाई थप सुदृढ बनाउने विश्वास महासंघले लिएको छ । 

संयुक्त राष्ट्र संघको महासभाले सन् १९९४ मा अगस्ट ९ लाई अन्तर्राष्ट्रिय विश्व आदिवासी दिवसका रूपमा मनाउने निर्णय गरेपछि विश्वका विभिन्न मुलुकहरूमा आदिवासी समुदायले यस दिवसलाई आफ्नो अस्तित्व, पहिचान, अधिकार र सम्मानको साझा अभियानका रूपमा निरन्तर मनाउँदै आएका छन् ।