ढाका- बंगलादेश राष्ट्रिय क्रिकेट टोलीका पूर्वकप्तान तथा अवामी लिगका पूर्वसांसद शाकिब अल हसनको मगुरास्थित घरमा आक्रमण भएको छ।

पूर्वप्रधानमन्त्री शेख हसिनाले आयोजना गरेको भर्चुअल पत्रकार सम्मेलनमा शाकिब सहभागी भएको केही घण्टापछि उक्त घटना भएको हो।

स्थानीय समयअनुसार राति करिब ८:४५ देखि ९ बजेको बीचमा भएको आक्रमणकारीले शाकिबको घरमा ढुंगा प्रहार गरी झ्यालका सिसा फुटाएका थिए।

मगुरा सदर प्रहरीका अधिकारी मोहम्मद अब्दुल्लाह अल मामुनका अनुसार आक्रमणकारीहरूले घरमा आगो लगाउने प्रयास पनि गरेका थिए। त्यसका लागि उनीहरूले कोल्ड ड्रिंकका बोतलमा पेट्रोल भरेर ल्याएको दाबी गरिएको छ।

घटना हुँदा घर खाली रहेकाले कुनै मानवीय क्षति भएको छैन। शाकिब हाल श्रीलंकामा रहेका छन्। घटनापछि सुरक्षाका लागि घर वरिपरि प्रहरी परिचालन गरिएको छ।

सांसद बनेपछि पनि क्रिकेट खेल्न छाडेनन् शाकिब

शाकिबले सांसद निर्वाचित भएपछि पनि अन्तर्राष्ट्रिय क्रिकेट तथा टी–२० लिग खेल्न छाडेका थिएनन्। सन् २०२४ को अगस्टमा बंगलादेशमा सरकारविरुद्ध आन्दोलन चर्किँदा उनी आलोचनाको केन्द्रमा परेका थिए।

सरकारी सेवामा आरक्षणको विरोधमा सुरु भएको विद्यार्थी आन्दोलनका क्रममा अवामी लिगका सांसद भएकै कारण शाकिब मौन बसेको आरोप उनीमाथि लागेको थियो।

शेख हसिनाको सरकार पतन भएपछि अवामी लिगका नेता तथा सांसदहरूको घरमा देशका विभिन्न स्थानमा आक्रमण भएका थिए।

त्यसबेला पनि मगुरास्थित शाकिबको घर निशानामा परेको थियो। त्यस समयमा पनि उनी घरमा थिएनन्।

शेख हसिनाजस्तै शाकिबविरुद्ध पनि हत्या मुद्दा

सन् २०२४ को अगस्टमा भएको राजनीतिक परिवर्तनपछि शाकिब अल हसन बंगलादेश छाडेर विदेश गएका थिए। उनी पक्राउ परेका छैनन्।

पछि विद्यार्थी आन्दोलनका क्रममा एक व्यक्तिको मृत्यु भएको घटनासँग सम्बन्धित हत्या मुद्दासहित उनीविरुद्ध विभिन्न आपराधिक मुद्दा दर्ता गरिएका थिए। त्यसबेला उनी विदेशमै रहेकाले बंगलादेश प्रहरीले उनलाई पक्राउ गर्न सकेको थिएन।