काठमाडौं । फ्लाई दुबईले पोखराबाट उडान भर्ने भएपछि यस क्षेत्रका पर्यटन व्यवसायी उत्साहित भएका छन् ।

फ्लाई दुबई र पोखरा रेष्टुरेन्ट एन्ड बार एशोसियसन नेपालका पदाधिकारीबीच आइतबार पोखरामा छलफल पनि भएको थियो ।

फ्लाई दुबईका पदाधिकारीले पोखराबाट नियमितरुपमा फ्लाइट हुने र कम्तिमा पनि एक सय बढी देशका २४५ स्थानमा उडान भर्ने हुँदा पोखराबाट विश्वका जुनसुकै मुलुकमा पुग्ने हवाई यात्रुले उडान भर्न सक्ने बताएका थिए ।

त्यसैगरी विश्वका जुनसुकै कुनाबाट कनेक्टिङ फ्लाइट लिएर पनि पोखरा आउन सकिने हुँदा पोखराको पर्यटन व्यवसायमा सहयोग पुग्ने अपेक्षा गरिएको छ ।

रेवान पोखराका महासचिव वीरेन्द्र शेरचनले फ्लाई दुबईका पदाधिकारीसँगको छलफलपछि आफूहरु उत्साही भएको बताए ।

उनले फ्लाई दुबईबाट पोखरा भित्रिएका पर्यटकलाई कसरी सहुलियतरुपमा सेवा प्रवाह गर्न सकिन्छ भन्ने विषयमा पनि छलफल भएको बताए ।

यस अवसरमा दुवै पक्षबीच पर्यटन क्षेत्रको विकास, पारस्परिक सहकार्य अभिवृद्धि तथा आगामी दिनमा संयुक्त रूपमा सञ्चालन गर्न सकिने कार्यक्रमहरूबारे सकारात्मक विचार आदानप्रदान गरिएको थियो।
शेरचनले आगामी दिनमा थप छलफल गर्दै जाने विषयमा पनि कुराकानी भएको बताए ।