काठमाडौं – जारी फिफा विश्वकप एउटा नयाँ ट्रेन्डले चर्चा पाएको छ । त्यो हो- पिंक बुट (गुलाबी जुत्ता) ।

विश्वकपमा मुख्यत: ‘बिग थ्री’ ब्रान्ड नाइकी, एडिडास र पुमाले खेलाडीहरूलाई बुट स्पोन्सर गरेका छन् । यी तीनै ब्रान्ड एक अर्काका लागि हेभिवेट प्रतिस्पर्धी हुन् ।

फेरि, यी तीनै कम्पनीले एकै रङका जुत्ता खेलाडीहरूलाई उपलब्ध गराएका छन् । विश्वकप फुटबलको हरियो मैदान पिंक बुट टल्किएको दृश्यलाई धेरैको प्रिय बनेको छ ।

अर्कोतर्फ गुलाबी कलर हतपत पुरुषको रोजाइमा नपर्ने गर्छ । तर, विश्वकपमा गुलाबी बुट नै हाबी हुनु अर्को रोचक विषय हो । त्यही कारण यो पटक बुटको रङ पनि चासोको विषय बन्यो ।

यसअघिका विश्वकपमा खेलाडीहरूले हरियो, निलो, सुन्तला र सेतो रङको बुटको प्रयोग गर्दै आएका थिए । केही खेलाडीले आफू अनुकूलको प्रयोग गर्थे ।

अझ नाइकी, पुमा र एडिडास एक अर्कासँगको प्रतिस्पर्धाका लागि आकर्षक रङहरूका बुटहरू निकाल्ने होडमा हुन्थे । तर, यस पटक त्यस्तो भएन ।

प्रमुख प्रतिस्पर्धी मानिएका ब्रान्डहरूले नै पिंक बुटका लागि सहमति गरेका थिए । बिग थ्रि ब्रान्डको सहमति आफैँमा दुर्लभ हो । अझ उनीहरूको सहमतिले विश्वकप मैदनाबाट पिंक बुट फेसनका रुपमा परिणत हुन अर्को रोचक विषय हो ।

बिग थ्री ब्रान्डबीच पिंक बुटमा सहमति हुनुको प्रमुख कारण दृश्य प्रभाव रहेको नाइकीले बताएको छ । उसले भनेको छ, ‘मैदानको हरियो घाँसको पृष्ठभूमिमा गुलाबी रङले खेलाडीलाई प्रस्ट रूपमा फरक देखाउन मद्दत गर्छ । रंगशालामा र टेलिभिजन दुवैका दर्शकलाई दृश्यता सुनिश्चित गर्छ । यो हामीले ध्यान दिएको कुरा हो। विश्वकपमा हामी वास्तवमै दृश्य प्रभावमा ध्यान केन्द्रित थियौं ।’

दर्शकको कोणबाट पनि दृश्य प्रभावका विषयमा सुक्ष्म अनुसन्धान गरिएको नाइकीको दाबी छ । पुमा र एडिडासले पनि यस विषयमा अध्ययन गरेका थिए ।

अहिले गुलाबी रङ सबै लिङ्गले स्वीकार गरेकाले पनि सहज भएको बताइएको छ । खेलाडीको ‘गुलाबी जस्तो कडा र चम्किलो रङको बुट चाहियो’ भन्ने माग पनि सम्बोधन गर्ने प्रयास रहेको उक्त ब्रान्डले बताएको छ ।

अन्तर्राष्ट्रिय समाचार माध्यम फुटीहेडलाइन्सका अनुसार गुलाबी बुट खेलाडीको मानसिकतासँग पनि सम्बन्धित रहेकाले ब्रान्डहरूले सहमति गरेका हुन् ।

नाइकीले दाबी गरेको छ, ‘हाम्रो अनुसन्धानले खेलाडीहरू उच्च-दबावको क्षणमा आत्मविश्वास बढाउन विशेष गरी सबैभन्दा बोल्ड र चम्किलो रङहरू राहत दिन्छ । त्यसका लागि पिंक उपयुक्त भेटियो ।’