झापा– झापा प्रहरीले दमक नगरपालिका–८ निवासी २१ वर्षीया रमा तिवारीको हत्या प्रकरणका मुख्य आरोपितलाई पत्रकार सम्मेलनमार्फत सार्वजनिक गरेको छ।

जिल्ला प्रहरी कार्यालय झापाले शुक्रबार पत्रकार सम्मेलन गरी भारतको अररिया घर भई दमकमा बस्दै आएका ३४ वर्षीय राकेश कुमार पण्डितलाई पक्राउ गरिएको जानकारी दिएको हो।

घटना भएको करिब १० दिनपछि प्रहरीले अनुसन्धान टुङ्ग्याउँदै मुख्य आरोपित भारतीय नागरिक पण्डितलाई सार्वजनिक गरेको हो।

जिल्ला प्रहरी कार्यालय झापाकी प्रहरी उपरीक्षक वसुन्धरा खड्काका अनुसार पक्राउ परेका पण्डितविरुद्ध जिल्ला अदालतबाट पाँच दिनको म्याद थप गरिएको छ। उनीविरुद्ध जबर्जस्ती करणी तथा कर्तव्य ज्यानसम्बन्धी कसुरमा अनुसन्धान भइरहेको छ।

प्रहरीले सार्वजनिक गरेका विवरणअनुसार रकमको विवादका क्रममा भारतीय नागरिक पण्डितले रमाको घाँटी थिचेर हत्या गरेको प्रारम्भिक अनुसन्धानबाट खुलेको छ।

जिल्ला प्रहरी कार्यालय झापाले शुक्रबार आयोजित पत्रकार सम्मेलनमा करिब ३० वर्षीय भारतीय नागरिक पण्डितलाई सार्वजनिक गर्दै घटनाबारे विस्तृत जानकारी दिएको हो।

आरोपित पण्डित लामो समयदेखि दमक तथा आसपासका क्षेत्रमा टायल्स तथा मार्बल जडानको काम गर्दै आएको प्रहरीले जनाएको छ।

गत जेठ १६ गते दमक नगरपालिका–१० को सेतुमारी क्षेत्रमा रहेको रतुवा खोलाको पुलमुनि बोराभित्र युवतीको शव फेला परेको थियो।

पछि उक्त शव दमक–८ निवासी रमा तिवारीको रहेको पुष्टि भएपछि प्रहरीले घटनाको गम्भीर अनुसन्धान अघि बढाएको थियो।

प्रहरीका अनुसार मृतक र आरोपीबीच पहिलेदेखि चिनजान रहेको खुलेको छ। रकमको लेनदेनका विषयमा उत्पन्न विवादले हत्यासम्म भएको निष्कर्षमा अनुसन्धान पुगेको छ।

रमाको हत्या गरेपछि शवलाई मोटरसाइकलमा राखेर रतुवा खोलाको पुलमुनि पुर्‍याई बोराभित्र राखेर फालिएको प्रहरीले जनाएको छ।

मोबाइल फोनको कल डिटेल, लोकेसन ट्र्याकिङ, डिजिटल प्रमाण तथा स्थानीय व्यक्तिहरूको बयानका आधारमा प्रहरीले आरोपितसम्म पुग्न सफल भएको जनाएको छ। घटनामा प्रयोग भएको मोटरसाइकलसमेत बरामद गरिएको छ।

प्रहरीले घटनाको अनुसन्धान लगभग सम्पन्न भएको र सङ्कलित प्रमाणका आधारमा कानुनी प्रक्रिया अगाडि बढाइएको जनाएको छ। मृतकका परिवारजनले दोषीमाथि कडा कारबाहीको माग गरेका छन् ।