काठमाडौं– मनसुनका समयमा हुनसक्ने खतरा र त्यसको प्रभावकारी खोज तथा उद्धारका लागि भक्तपुरमा विपद् प्रतिकार्य तथा जल उद्धार अभ्यास गरिएको छ ।  

भक्तपुर जिल्लामा आइपर्ने विभिन्न विपद् तथा प्राकृतिक प्रकोपको प्रतिकार्य तथा पूर्व तयारीका लागि जिल्ला प्रहरी परिसर भक्तपुरले भक्तपुर नगरपालिका–१ स्थित भाज्या पुखुमा जल उद्धार अभ्यास गरेको हो । 

सो क्रममा पोखरीमा डुबेका व्यक्तिलाई ज्यान जोगाउने, उद्धार गरेर ल्याएर प्राथमिक उपचार गर्ने, रबर बोटको प्रयोगसम्बन्धी अभ्यास गरिएको थियो । 

विभिन्न विपद् तथा प्राकृतिक प्रकोपको प्रतिकार्य तथा पूर्व तयारीका लागि भक्तपुरमा कार्यरत प्रहरीलाई तयारी अवस्थामा राख्नका लागि अभ्यासको आयोजना गरिएको जिल्ला प्रहरी परिसर भक्तपुरका प्रहरी निरीक्षक दाताराम अधिकारीले बताए । 

विपद् प्रतिकार्य तथा जल उद्धार अभ्याससँगै विपद् प्रतिकार्यका लागि भक्तपुरमा प्रहरीको तयारी चुस्त पारिएको परिसरले जनाएको छ ।