पाटन– नेपाली कांग्रेस बागमती प्रदेश संसदीय दलले मुख्यमन्त्री इन्द्रबहादुर बानियाँमाथि लागेका सम्पत्ति शुद्धीकरणसम्बन्धी विषयमा निष्पक्ष र न्यायोचित छानबिन गर्न आग्रह गरेको छ।

प्रदेश सुशासन केन्द्र, जावलाखेलमा आज बसेको संसदीय दलको बैठकले यस्तो निर्णय गरेको हो। बैठकमा संसदीय दलका नेता तथा मुख्यमन्त्री बानियाँकै सभापतित्व रहेको थियो।

संसदीय दलका सचिव मीनकृष्ण महर्जनका अनुसार बैठकले छानबिन प्रक्रिया पारदर्शी र विश्वसनीय बनाउन सम्बन्धित निकायलाई आग्रह गर्ने निष्कर्ष निकालेको छ।

त्यसैगरी, बैठकले बागमती प्रदेश सरकारले आर्थिक वर्ष २०८३-८४ का लागि आयोजना छनोट गर्दा प्रदेशसभा सदस्यहरूको माग र क्षेत्रगत भौगोलिक अवस्थालाई आधार बनाउने निर्णयसमेत गरेको छ।