काठमाडौँ – मुम्बई इन्डियन्सले इन्डियन प्रिमियर लिग (आइपिएल) को ४७औँ खेलमा लखनऊ सुपर जायन्ट्समाथि ६ विकेटको रोमाञ्चक जित हात पारेको छ । सोमबार राति घरेलु मैदान वाङ्खेडेमा भएको उच्च स्कोरको खेलमा मुम्बईले २ सय २९ रनको विशाल लक्ष्य ८ बल बाँकी छँदै पूरा गरेको हो ।

मुम्बईको जितमा ओपनर र्यान रिकेल्टन नायक बने । उनले मात्र ३२ बलमा ८३ रनको विष्फोटक इनिङ्स खेल्दै टोलीको जितको आधार तय गरे । रिकेल्टनले आफ्नो इनिङ्समा चौका र छक्काको वर्षा गर्दै लखनउका बलरलाई दबाबमा राखेका थिए । उनी ‘प्लेयर अफ द म्याच’ बने ।

यसअघि टस हारेर पहिले ब्याटिङ गरेको लखनऊ सुपर जायन्ट्सले निर्धारित २० ओभरमा ५ विकेट गुमाएर २ सय २८ रनको बलियो योगफल खडा गरेको थियो ।

मुम्बईले १८.४ ओभरमा ४ विकेट गुमाएर २ सय २९ रन बनाउँदै लक्ष्य पूरा गरेको हो । मुम्बईका लागि रोहित शर्माले ४४ बलमा ८४ रनको आक्रामक अर्धशतकीय पारी खेले । मुम्बईका लागि रिकेल्टन र रोहितले पहिलो विकेटका लागि १४३ रनको साझेदारी गरेका थिए ।

यो जितसँगै १० खेल खेलेको मुम्बईले ६ अंक बनाएको छ । तालिकाको पुछारमा रहेको लखनउ भने नौ खेल खेल्दा चार अंकमा सीमित छ ।