विराटनगर– नोबेल मेडिकल कलेज शिक्षण अस्पताल मा एपिलेप्सी शल्यक्रियासम्बन्धी अन्तर्राष्ट्रियस्तरको चौथो ‘एनआइएनएस सिम्पोजियम’ सफलतापूर्वक सम्पन्न भएको छ । ‘एपिलेप्सी शल्यक्रियामा प्रगति’ विषयमा केन्द्रित उक्त कार्यक्रम २०८२ साल चैत २० र २१ गते २ दिन आयोजना गरिएको हो ।

न्युरोसाइन्स इन्स्टिच्युट अफ नोबेल को आयोजनामा सम्पन्न सिम्पोजियम अन्नपूर्ण न्युरोलोजिकल इन्स्टिच्युट एण्ड एलाइड साइन्सेस को सहकार्यमा सम्पन्न भएको हो । कार्यक्रमका कोर्स निर्देशक प्रा. डा. प्रकाश काफ्ले रहेका थिए भने प्रमुख अतिथिका रूपमा प्रा.डा. बसन्त पन्त सहभागी थिए ।

कार्यक्रमकै अवसरमा एनआइएनएस र एएनआइएनएएसबीच आपसी सहकार्य विस्तार गर्ने उद्देश्यले समझदारीपत्र (एमओयू) मा हस्ताक्षर गरिएको छ। उक्त समझदारीपत्रमा नोबेल मेडिकल कलेजका तर्फबाट डा. प्रकाश काफ्ले र अन्नपूर्ण न्युरोलोजिकल इन्स्टिच्युट एण्ड एलाइड साइन्सेसका तर्फबाट डा.बसन्त पन्तले हस्ताक्षर गरेका छन् । 

सिम्पोजियममा एपिलेप्सी शल्यक्रियासम्बन्धी विभिन्न वैज्ञानिक प्रस्तुतीकरण, केस छलफल तथा क्लिनिकल मूल्याङ्कनका सत्रहरू सञ्चालन गरिएका थिए । साथै ‘टेम्पोरल लोबेक्टोमी’ र ‘कर्पस क्यालोसोोटोमी’ सम्बन्धी क्याडाभेरिक कार्यशाला समेत सम्पन्न गरिएको आयोजकले जनाएको छ ।

कार्यक्रममा देशभरका विशेषज्ञ चिकित्सक, चिकित्साशास्त्रका विद्यार्थी तथा स्वास्थ्यकर्मीहरूको उल्लेखनीय सहभागिता रहेको थियो । आयोजकका अनुसार यस्ता कार्यक्रमले नेपालमा एपिलेप्सी उपचार तथा शल्यक्रियाको क्षेत्रमा ज्ञान आदानप्रदान तथा सीप अभिवृद्धिमा महत्त्वपूर्ण योगदान पुर्‍याउने विश्वास लिइएको छ ।