दोलाखा- देशका अन्य ठाउँमा मतदान सकिइसक्दा दोलखाको तामाकोशी गाउँपालिका वडा नम्बर ४ स्थित मालुको गोल्मेश्वर मावि मतदानस्थलमा अहिले मतदान भइरहेको छ ।

बिहीबार बिहान मतदान सुरु हुनेबित्तिकै ५६ बुक मतपत्र लुटिएपछि रोकिएको मतदान अहिले अघि बढेको हो ।

प्रतिनिधिसभा सदस्य निर्वाचनको मतदान सुरू भएलगत्तै मतदानस्थलमा खटिएका कर्मचारीलाई हातपात गर्न खोज्दै एउटा समूहले उक्त मतपत्र लुटेको थियो।

नेकपा एमाले र राष्ट्रिय स्वतन्त्र पार्टीले भने उक्त काममा नेपाली कांग्रेस र नेपाली कम्युनिस्ट पार्टीका कार्यकर्ताको संलग्नता रहेको आरोप लगाएका थिए ।

बिहानैदेखि जारी विवाद साँझ मात्रै साम्य भएपछि मतदान अघि बढेको छ। सर्वदलीय बैठक बसेर मतदान सुरू गर्ने सहमति गरेपछि मतदाता खोज्न थालिएको छ।

हराएको मतपत्रको खोजी गरिए पनि मतपत्र नभेटिँदा मतदान अर्को दिनलाई सार्नुपर्ने अवस्था आएको थियो । तर अहिले त्यहाँ फेरि मतदान अघि बढाइएको हो ।

बुथ कब्जा गर्न मतपत्रको बुक नै लिएर हिँडेकानेपाली कांग्रेसका वडा सदस्य यज्ञबहादुर श्रेष्ठ, तामाकोशी गाउँपालिकास्थित तरुण दलका अध्यक्ष अनिल श्रेष्ठ र नेकपाका नेता अर्जुन योगीविरुद्ध मुद्दा चल्ने भएको छ।

मतपत्र लुटपाटमा संलग्न यी तीनजनाको पहिचान भएको छ । अरू चारजना पनि नियन्त्रणमा छन् । उनीहरूलाई रिहा गर्ने तयारी प्रहरीको छ। मतपत्र लुटपाटको आरोप लागेका कांग्रेस र नेकपाले स्थानीय नेताहरूलाई तत्काल छाड्न भनेका छन्।

विवाद नमिलेपछि मतदानको अर्को मितिका लागि मतदान अधिकृतले अर्को मिति तोक्न भनिएको थियो । तर अहिले सहमति भएर मतदान अघि बढेपछि मतदातालाई माइकिङ गर्दै बोलाइँदैछ ।