काठमाडौं- पाकिस्तानमा अफगान पत्रकारमाथि धरपकड तीव्र भएको छ । पछिल्लो समय पाकिस्तानी सुरक्षा बलले पाँच जना अफगान पत्रकारलाई पक्राउ गरेको छ ।

पछिल्लो दुई सातामा पाँच जना अफगान पत्रकार पक्राउ परेको अफगानिस्तान मिडिया सपोर्ट अर्गनाइजेसनले जनाएको छ । उक्त संस्थाले पक्राउ पर्नेमा समिम फोरोग फइजी र अताउल्लाह सिरजद पनि रहेको जनाएको छ ।

अन्यको पहिचान भने सुरक्षा कारण देखाउँदै सार्वजनिक गरिएको छैन । उक्त संस्थाले पक्राउ परेकामध्ये केही पत्रकार रिहा भएको जनाएको छ ।

यद्यपि यस्ता धरपकडले अफगान पत्रकारमाझ असुरक्षा बढाएको जनाइएको छ । अफगानिस्तानमा सत्ता परिवर्तन भएयता ठूलो सङ्ख्यामा अफगान पत्रकार देश छाडेर पाकिस्तान पुगेका छन् ।

पाकिस्तान पुगेका कतिपय पत्रकारको भिसाको म्याद पनि थप्न समस्या भइरहेको उक्त संस्थाले उल्लेख गरेको छ । उक्त संस्थाले मानव अधिकारवादी संगठन तथा अन्तर्राष्ट्रिय समुदायलाई पाकिस्तानमा रहेका अफगान पत्रकारको पक्षमा आवाज उठाउन पनि आह्वान गरेको छ ।