काठमाडौं – नेपाली क्रिकेट टोलीका कप्तान रोहित पौडेलले विश्वकप केवल प्रतियोगिता मात्र नभइ एउटा पुस्ताबाट अर्को पुस्तामा सर्ने सपना पनि भएको बताएका छन् ।

आईसीसी टी–२० विश्वकप सुरु हुनुअघि आयोजित कप्तान मिटमा उनले आफ्नो क्रिकेट यात्राको जरा सन् २०१४ को विश्वकपसँग गाँसिएको स्मरण गरे।

रोहितका अनुसार अहिले नेपालबाट विश्वकप खेल्दै गरेका धेरै खेलाडीहरू त्यही २०१४ को विश्वकप हेर्दै क्रिकेटप्रति आकर्षित भएका हुन्। ‘हामी आफैं सन् २०१४ को विश्वकप हेरेर हुर्किएका हौं,’ उनले भने, ‘अब हामी मैदानमा उत्रिँदा, हामीलाई हेरेर अर्को पुस्ता क्रिकेटतर्फ प्रेरित हुने समय आएको छ।’

नेपालले सन् २०१४ मा पहिलोपटक विश्वकपमा उपस्थिति जनाएपछि २०२४ मा दोस्रो सहभागिता जनाएको थियो। अब तेस्रो पटक विश्वकप खेल्न लागेको नेपालका लागि यो यात्रालाई निरन्तरता मात्र होइन, पहिचान अझ बलियो बनाउने अवसरको रूपमा पनि हेरिएको छ।

आफ्नो प्रदर्शनप्रति आत्मविश्वासी देखिएका रोहितले विश्वकपमा सक्दो उत्कृष्ट खेल देखाउने प्रतिबद्धता जनाए।