काठमाडौं– गण्डकी प्रदेशका प्रमुख डिल्लीराज भट्टले संविधानको मर्म अनुसार जिम्मेवार भएर काम गर्नुपर्नेमा जोड दिएका छन् । 

गण्डकी प्रदेश स्थापना दिवसका अवसरमा गण्डकी प्रदेश सभा र गण्डकी प्रदेश सरकारद्वारा बिहीबार कास्कीमा आयोजित कार्यक्रममा उनले नेपालको संविधान, संवैधानिक कार्यसूची, प्रचलित कानून, संघीयताको मर्म अनुसार नागरिकसामु जिम्मेवार भई काम गर्नुपर्ने बताए ।

नागरिकसामु जिम्मेवार भई उनीहरूका अपेक्षा तथा चाहना गण्डकी प्रदेश सभा र गण्डकी प्रदेश सरकारले आ–आफ्ना कार्यक्षेत्रबाट पूर्ण प्रतिबद्ध रही पूरा गर्न सक्नुपर्ने उनले बताए ।

प्रदेश स्थापनाको औचित्य प्रमाणित गर्न सरोकारवाला निकायले थप कसरत गर्नुपर्ने भन्दै उनले संवैधानिक अधिकार बमोजिम प्राप्त जिम्मेवारी कार्यान्वयनमा संघीय सरकार तथा स्थानीय तहसँग समन्वय गर्नुपर्ने आवश्यकता रहेको औँल्याए । 

गण्डकी प्रदेशका मुख्यमन्त्री सुरेन्द्रराज पाण्डेले लोकतन्त्र एवं संघीय शासन प्रणाली अनुरूप व्यवस्थालाई सबलीकरण गर्दै सर्वसाधारणको जनजीवनमा सकारात्मक परिवर्तन ल्याउने मार्गमा गण्डकी प्रदेश सरकार दृढ संकल्पित रहेको बताए । 

गण्डकी प्रदेश सभाका सभामुख कृष्णप्रसाद धितालले प्रदेशको औचित्यलाई पुष्टि गर्ने गरी काम गर्नु आवश्यक रहेको बताए ।