काभ्रेपलाञ्चोक– काभ्रेपलाञ्चोक जिल्लामा प्राकृतिक विपत्तिका कारण करिब एक हजार दुई सय रोपनी जमिनमा लगाइएको कृषि बाली क्षति भएको छ । क्षतिबाट प्रभावित किसानलाई राहत उपलब्ध गराउन बाग्मती प्रदेश सरकारसमक्ष सिफारिस गरिएको छ ।

जिल्ला कृषि विकास कार्यालय धुलिखेलले गत वर्ष र चालु वर्षमा आएको प्राकृतिक विपत्तिका कारण खाद्यान्न, तरकारी, फलफूल बाली तथा तरकारी टनेलमा क्षति पुगेका १५१ किसानलाई राहत उपलब्ध गराउन प्रदेश सरकारलाई सिफारिस गरेको हो ।

कार्यालयका अनुसार ९६१ रोपनी जमिनमा भएको खाद्यान्न बाली क्षतिबापत १४ लाख ४१ हजार ५ सय ९० र २६५ रोपनी जमिनमा लगाइएको तरकारी बाली क्षतिबापत ७ लाख ८० हजार ६ सय २५ राहत रकम सिफारिस गरिएको छ ।

जिल्ला कृषि विकास कार्यालयका प्रमुख कुलप्रसाद दवाडीले गत वर्ष र यस वर्षको प्राकृतिक विपत्तिका कारण कृषि बालीमा क्षति पुगेका किसानलाई राहत उपलब्ध गराउन प्रदेशस्थित कृषि मन्त्रालयमा सिफारिस गरिएको जानकारी दिए।

उनका अनुसार करिब तीन हजार फलफूलका बिरुवामा क्षति पुगेको भन्दै त्यसबापत दुई लाख नौ सय तथा तीन सय बाँसका टनेल क्षतिबापत प्रति टनेल रु १५ हजारका दरले राहत उपलब्ध गराउन प्रदेश कृषि मन्त्रालयलाई अनुरोध गरिएको छ ।

प्रदेश सरकारले प्राकृतिक विपत्तिबाट खाद्यान्न बालीमा क्षति पुगेका किसानलाई प्रति रोपनी १ हजार ५ सय र तरकारी बालीमा क्षति पुगेका किसानलाई प्रति रोपनी रु २ हजार ५ सय राहत उपलब्ध गराउँदै आएको छ । यस्तै बाँसका टनेलमा क्षति भएमा प्रति वर्गमिटर रु ५० र फलफूलका बिरुवा क्षति भएमा प्रतिबोट रु ५० राहत दिने व्यवस्था रहेको छ ।

कार्यालयका अनुसार स्थानीय तहको सिफारिस, प्राविधिक प्रतिवेदन, क्षतिको मूल्यांकन तथा जिल्लास्थित राहत व्यवस्थापन समितिको प्रतिवेदन प्राप्त भएपछि मात्र प्रदेश सरकारले राहत रकम उपलब्ध गराउनेछ ।

गत वर्षको बाढीपहिरोबाट कृषि बालीमा क्षति पुगेका किसानका लागि रु ७८ लाख राहत सिफारिस गरिएकोमा हालसम्म ५३ लाख प्राप्त भई सम्बन्धित किसानलाई वितरण गरिएको कार्यालयले जनाएको छ।