नयाँदिल्ली– नेपाली कम्युनिस्ट पार्टीका संयोजक पुष्पकमल दाहाल प्रचण्डले भदौ २४ गते नेपालमा भएको विध्वंश ठूलो डिजाइन र योजनामा भएको बताएका छन्।

भारतको राजधानी नयाँदिल्लीमा नेकपानिकट प्रवासी नेपालीको ‘एकता सन्देश सभा तथा साक्षात्कार कार्यक्रम’ लाई सम्बोधनका क्रममा सोमबार उनले यस्तो बताएका हुन् ।

‘भदौ २३ गते कलिला युवा-विद्यार्थीको हत्या स्वीकार्न सकिने खालको थिएन । त्यो एकदमै निर्दयी घटना थियो’, उनले भने, ‘तर भदौ २४ गते देशभर भएको विध्वंस र आगजनी जेन-जीहरूले गरेका थिएनन्, त्यो लुटपाट जेन-जीबाट भएको होइन । निकै ठूलो डिजाइन र योजनमा विध्वंश र लुट मच्चाइयो ।’

उनले जेन-जीहरूको आन्दोलनलाई आफूहरूले समर्थन गरे पनि देशमा भएको विध्वंश स्वीकार्न नसकिने बताए । ‘भदौ २४ गते देशमा आतंक र त्रासको वातावरण थियो । लुटपाट मच्चाइएको थियो’, उनले भने, ‘त्यसबेला परिस्थितिलाई सम्हाल्न हामीले रातभर पहल गर्‍यौँ । निकासका लागि हामीले राष्ट्रपतिसँग वार्ता गरेका थियौँ।’

उनले जेन-जीको आन्दोलनलाई समर्थन र अपनत्व लिने काम पनि सबैभन्दा पहिले नेकपाले नै गरेको बताए । दाहालले आफ्नो नेतृत्वको सरकारले भ्रष्टाचार नियन्त्रण अभियान चलाएर सुशासन कायम गरिरहेका बेला कांग्रेस-एमालेले हटाउँदा अहिले देशमा यो संकट आएको पनि गुनासो गरे।