काठमाडौँ – बलिउडकी चर्चित अभिनेत्री रानी मुखर्जी ‘ओ माई गड ३’ मा सामेल भएकी छिन्। यो पछिल्ला वर्षको सबैभन्दा ठूलो कास्टिङमध्ये एक मानिन्छ। ९० दशकका दुई आइकनिक कलाकार, रानी मुखर्जी र अक्षय कुमार, लामो समयपछि एकसाथ पर्दामा देखिने तयारीमा छन्, जसले फिल्म प्रेमीहरूमा उत्साहको लहर फैलाएको छ।

पिंकभिल्लाका अनुसार, फिल्म हाल प्रि–प्रोडक्सन चरणमा छ र २०२६ को मध्यसम्म छायांकन सुरु हुने अपेक्षा गरिएको छ। निर्देशक अमित रायले यस पटक पहिलेको भन्दा बढी सान्दर्भिक र प्रभावशाली कथा तयार पारेका छन्। ‘ओ माई गड’ अक्षय कुमारका मनपर्ने फ्रेन्चाइजमध्ये एक मानिन्छ, र रानी मुखर्जीको सामेल हुनुले कथा तथा प्रस्तुतीमा नयाँ उचाइ थप्ने अनुमान गरिएको छ।

पहिलो दुई भाग ‘ओ माई गड’ र ‘ओ माई गड २’ ले मनोरञ्जनसँगै सामाजिक सन्देश प्रभावकारी तरिकाले प्रस्तुत गरेका थिए। यस तेस्रो भागले पनि दर्शकलाई हसाउने, सोच्न बाध्य पार्ने र समाजसँग सम्बन्धित मुद्दाहरू उजागर गर्ने लक्ष्य राखेको छ।

दुई स्टार कलाकारहरूको जोडी र अमित रायको कथानकले ‘ओ माई गड ३’ बलिवुडका सबैभन्दा प्रतिक्षित फिल्ममध्ये एक बनाइसकेको छ।