काठमाडौं- गत भदौ २३ र २४ भएको जेन-जी आन्दोलनसम्बन्धी घटनाको छानबिन गर्न गठन गरिएको उच्चस्तरीय जाँचबुझ आयोगले तत्कालीन प्रधानमन्त्री केपी शर्मा ओलीलाई विदेश भ्रमण र उपत्यका छाड्न रोक लगाउने आदेश फुकुवा गरेको छ।

आयोगका सदस्य एवम् प्रवक्ता विज्ञानराज शर्माले सोमबार विज्ञप्तिमा निकालेर अनुसन्धानको दायरामा रहेका तत्कालीन प्रधानमन्त्री ओलीसँग सोधपुछ पूरा भइसकेकाले रोक लगाउने निर्णयको औचित्य सकिएको बताएका हुन् ।

उक्त निर्णयसँगै अब ओलीले भक्तपुरको गुण्डू छाडेर देशका अन्य जिल्ला जान पाउने भएका छन् । यससँगै अब ओलीलाई पार्टीको अभियान लिएर देशका अन्य जिल्लामा पुग्न पनि अनुमति मिलेको छ।

उनलाई अब विदेश भ्रमणको बाटो पनि खुलेको छ। ओलीले स्थानहदमा राखेर फागुन २१ को चुनावमा जान नसकिने अडान राखिरहेका थिए।

तर आयोगको टोलीले गुण्डूमै ओलीको बयान लिएको थियो । ओलीले लिखित बयान दिएसँगै स्थानहद पनि फुकुवा गरिएको हो । यससँगै स्थानहदमा राखिएका सबै नेता र कर्मचारीमाथिको अनुसन्धान पनि सकिएको आयोगले जनाएको छ।