बेइजिङ- पाकिस्तान र चीनले अफगानिस्तानको भूमि कुनै पनि अर्को देशविरुद्ध ‘आतंकवादी गतिविधि’का लागि प्रयोग हुनु नहुने बताएका छन्।

पाकिस्तान–चीन विदेशमन्त्रीस्तरीय रणनीतिक वार्ताको सातौँ चरण सम्पन्न भएपछि सोमबार संयुक्त वक्तव्य जारी गरिएको हो।

यस बैठकका लागि पाकिस्तानका उपप्रधानमन्त्री तथा विदेशमन्त्री मोहम्मद इसहाक डार बेइजिङ गएका थिए।

वक्तव्यमा भनिएको छ, ‘दुवै पक्षले क्षेत्रीय र विश्वव्यापी सुरक्षाका लागि गम्भीर खतरा बनेका अफगानिस्तानमा रहेका सबै आतंकवादी समूहलाई पूर्ण रूपमा समाप्त गर्न अझ स्पष्ट कदम चाल्नुपर्नेमा जोड दिएका छन्।’

संयुक्त वक्तव्यमा दुवै देशले अफगानिस्तानको विषयमा नजिकको सम्पर्क र समन्वय कायम राख्ने पनि बताएका छन्।

वक्तव्यमा पाकिस्तानले ‘एक चीन’ सिद्धान्तप्रति आफ्नो दृढ प्रतिबद्धता पुनः पुष्टि गरेको छ । ताइवान चीनको अभिन्न भूभाग भएको उल्लेख गरिएको पनि वक्तव्यमा भनिएको छ ।