काठमाडौं– उच्च अदालत पाटनले नेपाल चिकित्सक संघको केन्द्रीय कार्यसमितिको निर्वाचन प्रक्रिया तत्काल अगाडि नबढाउन अन्तरिम आदेश जारी गरेको छ।

आइतबार न्यायाधीशद्वय ऋषिपराम निरौला र दीपक खनालको संयुक्त इजलासले अजय कुमार मिश्रसहितका निवेदकहरूले नेपाल चिकित्सक संघलाई विपक्षी बनाएर दायर गरेको निषेधाज्ञा सम्बन्धी रिटमा सुनुवाइ गर्दै उक्त आदेश जारी गरेको हो।

अदालतका अनुसार नेपाल चिकित्सक संघले असोज २० गते सार्वजनिक गरेको निर्वाचन कार्यक्रम तथा निर्वाचन नियमावली, संघको निर्वाचन नियमावली २०७० को परिच्छेद ४ अन्तर्गत नियम ६ मा उल्लेखित प्रक्रिया पूरा नगरी ल्याइएको देखिएको छ। यस कारण निवेदकहरू उम्मेदवारी दर्ता गर्ने लगायत निर्वाचन प्रक्रियामा सहभागी हुन नपाउने अवस्था सिर्जना भएको अदालतको ठहर छ।

यस परिस्थितिमा निर्वाचन प्रक्रिया अगाडि बढाउनु उपयुक्त नहुने ठहर गर्दै उच्च अदालत नियमावली २०७३ को नियम ४२ बमोजिम अन्तरिम आदेश जारी गरिएको हो। साथै, अदालतले विपक्षी नेपाल चिकित्सक संघलाई कानुनबमोजिम सूचना दिई आगामी पेशीमा उपस्थित हुन समेत निर्देशन दिएको छ ।

यो आदेशसँगै काठमाडौं उपत्यकाबाहिर माघ २ र ३ गते र काठमाडौं उपत्यकामा १५,१६ र १७ गतेका लागि तोकिएको चिकित्सक संघको निर्वाचन रोकिएको छ।