काठमाडौं- स्पेनिस ला लिगा अन्तर्गत आइतबारको खेलमा रियल मड्रिडले शानदार जित निकालेको छ । घरेलु मैदानमा भएको खेलमा रियलले बेटिसलाई ५-१ गोल अन्तरले पराजित गरेको हो ।

खेलको सुरुदेखि नै आक्रामक देखिएको रियलका लागि गोन्जालो गार्सियाले ह्याट्रिक पूरा गरे ।

गोन्जालोले पहिलो हाफमा एक र दोस्रो हाफमा थप दुई गोल गर्दै ह्याट्रिक पूरा गरेका हुन् । उनले खेलको २०, ५० र ८२ औं मिनेटमा गोल गरेका हुन् ।

रियलका लागि थप दुई गोल राउल असेन्सियो र फ्रान गार्सियाले गरे । असेन्सियोले खेलको ५६ मिनेटमा गोल गरेका थिए भने गार्सियाले थप समयको तेस्रो मिनेटमा गोल गरेका हुन् । बेटिसका लागि सान्वना गोल कुचो हर्नान्डेजले खेलको ६६ औं मिनेटमा गरे ।

यो जितसँगै १९ खेल खेलेको रियलले ४५ अंक जोडेको छ । रियल तालिकाको दोस्रो स्थानमा छ भने शीर्ष स्थानको बार्सिलोनाको समान खेलमा ४९ अंक छ ।