पोखरा– नेपालीहरूको महान् पर्व वडादशैँ नजिकिँदै गर्दा हिमाली जिल्लाबाट भेडा–च्याङ्ग्रा पोखरा भित्रिन थालेका छन्। यस वर्षको पहिलो लटमा डोल्पाबाट च्याङ्ग्रा लिएर व्यापारी मीनप्रसाद बोहरा पोखरा आइपुगेका छन्।

विगत तीन वर्षदेखि भेडा–च्याङ्ग्राको व्यापार गर्दै आएका बोहराले यस वर्ष पहिलोपटक एक सय वटा भेडा–च्याङ्ग्रा पोखरा ल्याएका हुन्। उनले पोखरा ल्याएको च्याङ्ग्रामध्ये पहिलो दिनमै ३० वटा बिक्री भइसकेको बताए ।

व्यापारीहरूका अनुसार यस वर्ष मुस्ताङ, बझाङ, हुम्ला, सुर्खेत, डोल्पालगायत हिमाली तथा पहाडी क्षेत्रबाट करिब १० हजारभन्दा बढी भेडा–च्याङ्ग्रा पोखरा भित्रिने अनुमान गरिएको छ।

डोल्पाबाट ल्याइएका च्याङ्ग्राको मूल्य प्रतिगोटा २१ हजारदेखि ४० हजार रुपैयाँसम्म रहेको व्यापारी बोहराले बताए । उनका अनुसार भेडाको मूल्य भने च्याङ्ग्राको तुलनामा केही कम हुने गरेको छ।

तस्बिर : अर्जुन गाहा/नेपाल फोटो लाइब्रेरी