मकवानपुर – त्रिभुवन राजमार्गअन्तर्गत मकवानपुरको भीमफेदी गाउँपालिका-२ स्थित तिलटारमा तरकारी बोकेको ट्रक दुर्घटना हुँदा एक जनाको मृत्यु भएको छ भने चालक घाइते भएका छन् ।

बुधबार राति करिब २:३० बजे पालुङबाट वीरगञ्जतर्फ जाँदै गरेको मधेश प्रदेश ०३-००२ ख ५०९५ नम्बरको ६ चक्के डिब्बा ट्रक अनियन्त्रित भई सडकबाट करिब १०० मिटर तल चण्डी खोलामा खसेको थियो । वर्षा र बाक्लो हुस्सुका कारण ओरालो सडकमा ट्रक चिप्लिएर दुर्घटना भएको प्रहरीले जनाएको छ ।

दुर्घटनामा ट्रकमा सवार मकवानपुरको राक्सिराङ गाउँपालिका-९ का ३६ वर्षीय अर्जुन कार्कीको मृत्यु भएको छ । गम्भीर घाइते भएका कार्कीको उपचारका क्रममा हेटौंडा अस्पतालमा बिहान ९:१५ बजे चिकित्सकले मृत घोषणा गरेका हुन् ।

दुर्घटनामा मृतकका भतिज तथा ट्रक चालक २३ वर्षीय रञ्जित कार्की घाइते भएका छन् । उनको दाहिने खुट्टा भाँचिनुका साथै शरीरका विभिन्न भागमा चोट लागेको र हेटौंडा अस्पतालमा उपचार भइरहेको छ ।

प्रहरीका अनुसार दुर्घटनाका बेला ट्रकमा दुई जना मात्रै सवार थिए । घटनाबारे थप अनुसन्धान भइरहेको इलाका प्रहरी कार्यालय भीमफेदीले जनाएको छ ।