काठमाडौं- नेपाली कांग्रेसभित्र पछिल्लाे समय शीर्ष नेताहरूबीच आन्तरिक राजनीतिक भेटघाट र छलफल तीव्र बनेको छ। बिहीबारदेखि शनिबारसम्म पार्टीका प्रभावशाली नेताहरूले विभिन्न स्थानमा छुट्टाछुट्टै भेटवार्ता गर्दै समसामयिक राजनीतिक अवस्था र पार्टीभित्रको रणनीतिबारे छलफल गरेका छन्।

बिहीबार नेता पूर्णबहादुर खड्का र डा. शेखर कोइरालाबीच गल्फुटारमा भेटवार्ता भएको थियो। सोही दिन खड्का र डा. शशांक कोइराला बीच महाराजगञ्जमा पनि छुट्टै छलफल भएको थियो।

त्यसै दिनविमलेन्द्र निधि, प्रकाशमान सिंह र डा. शशांक कोइरालाबीच बानेश्वर हाइटमा भेटवार्ता भएको थियो।

शुक्रबार भने कांग्रेस सभापति शेरबहादुर देउवा निकट शीर्ष नेताहरू गल्फुटारमा भेला भएर पार्टीको पछिल्लो अवस्था, सरकार र संगठनका विषयमा छलफल गरेका थिए।

शनिबार पनि भेटघाटको क्रम जारी रहँदा नेता विमलेन्द्र निधि र डा. शेखर कोइरालाबीच भेट भएको छ । बानेश्वर हाइटमा उनीहरुबीच छलफल भएको हो ।

पछिल्ला तीन दिनमा निरन्तर भइरहेका यी भेटवार्तालाई कांग्रेसभित्र विकसित राजनीतिक समीकरण, संगठनात्मक गतिविधि तथा आगामी रणनीतिसँग जोडेर हेरिएको छ। तर छलफलका एजेन्डाबारे औपचारिक रूपमा केही सार्वजनिक गरिएको छैन ।