काठमाडौं – मध्यपूर्वमा इरान र अमेरिकाबीच भएको युद्धविरामपछि पुनः तनाव बढेको छ। सोमबार इरानले संयुक्त अरब इमिरेट्स (यूएई)लाई लक्षित गर्दै क्षेप्यास्त्र तथा ड्रोन आक्रमण सुरु गरेको समाचार सार्वजनिक भएको छ ।

समाचारअनुसार इरानी आक्रमणपछि यूएईको राजधानी अबुधाबी तथा फुजैराह क्षेत्रमा विस्फोटका आवाज सुनिएका छन् । घटनापछि यूएईको रक्षा मन्त्रालयले देशको हवाई सुरक्षा प्रणाली इरानबाट आएका क्षेप्यास्त्र र मानवरहित ड्रोन (यूएभी)विरुद्ध सक्रिय रूपमा परिचालन गरिएको जनाएको छ ।

यूएई रक्षा मन्त्रालयले जारी गरेको सूचनामा देशका विभिन्न भागमा सुनिएका आवाजहरू हवाई सुरक्षा प्रणालीले क्षेप्यास्त्र र ड्रोन अवरोध गर्दा उत्पन्न भएको उल्लेख गरिएको छ । मन्त्रालयले सर्वसाधारणलाई शान्त रहन, सुरक्षा निकायले जारी गरेका निर्देशन पालना गर्न तथा झरेका अवशेष नछुन, नजिक नजान र तस्बिर नखिच्न आग्रह गरेको छ ।

यसअघि सोमबार नै इरानले अमेरिकी युद्धपोतलाई लक्षित गर्दै हर्मुज जलडमरु क्षेत्रमा दुई वटा क्षेप्यास्त्र प्रहार गरेको समाचार सार्वजनिक भएको थियो । त्यस्तै, सोही जलक्षेत्रमा दुई वटा व्यावसायिक पानीजहाजलाई लक्षित गरी पनि हमला गरिएको जनाइएको छ ।

पाकिस्तानको मध्यस्थतामा इरान र अमेरिकाबीच युद्धविराम भएको केही समयमै इरानले पुनः आक्रमण सुरु गरेपछि मध्यपूर्वमा सुरक्षा चुनौती थप जटिल बनेको विश्लेषण गरिएको छ। पछिल्ला घटनाक्रमले क्षेत्रीय तनाव पुनः चर्किन सक्ने संकेत दिएको छ ।