काठमाडौँ – बागमती प्रदेशले दोस्रो राष्ट्रिय बेसबल फाइभ च्याम्पियनसिपको उपाधि जितेको छ । आइतबार भएको फाइनल खेलमा सुदूरपश्चिम प्रदेशलाई १४–८ अङ्कको अन्तरले पराजित गर्दै बागमती च्याम्पियन बनेको हो ।

प्रतियोगितामा सात प्रदेश र विश्वविद्यालय गरी कुल ८ टोलीको सहभागिता रहेको आयोजक कमिटीका संयोजक एवं नेपाल बेसबल तथा सफ्टबल संघका उपाध्यक्ष सुरेन्द्र थपलियाले जानकारी दिए ।

च्याम्पियनसिपमा लुम्बिनी प्रदेशले तेस्रो स्थान हासिल गरेको छ । उपाधिसँगै बागमतीले ३० हजार, उपविजेता सुदूरपश्चिमले २० हजार र तेस्रो भएको लुम्बिनीले १० हजार रुपैयाँ पुरस्कार प्राप्त गरेका छन् ।

बागमतीका दिपेश माझी प्रतियोगिताको उत्कृष्ट खेलाडी घोषित भए । चौथो स्थानमा चित्त बुझाएको कोशी प्रदेशलाई संघकी सदस्य सुनिता थापाले व्यक्तिगत रूपमा १० हजार रुपैयाँ सान्त्वना पुरस्कार प्रदान गरे । विजेता टोली तथा खेलाडीलाई प्रमुख अतिथि एवं नेपाल ओलम्पिक कमिटीका अध्यक्ष राजीव श्रेष्ठ, ओलम्पिक कमिटीका सचिव भीमसिंह गुरुङ लगायतले पुरस्कार वितरण गरेका हुन् । कार्यक्रममा शिक्षा तथा खेलकुद मन्त्रालयका सचिवालय प्रमुख निसान महर्जनको पनि उपस्थिति रहेको थियो ।