काठमाडौं- पाकिस्तानको कराँचीमा एक जना इसाई किशोरीको जबरजस्ती धर्म परिवर्तन र विवाहलाई सदर गर्ने संघीय अदालतको फैसलाको कडा विरोध भएको छ । कराँची प्रेस क्लब बाहिर ठुलो संख्यामा क्रिस्चियन समुदायका मानिसहरू भेला भएर प्रदर्शन गरेका हुन् ।

प्रदर्शनकारीहरूले नाबालिक बालबालिकाको सुरक्षा र जबरजस्ती धर्म परिवर्तनविरुद्ध कडा कानुनको माग गर्दै नाराबाजी गरेका थिए । ३० वर्षीय मुस्लिम पुरुषले १३ वर्षीया मारिया शाहबाजलाई साथमा राख्न पाउने संघीय संवैधानिक अदालतको आदेशपछि प्रदर्शन गरिएको हो ।

विरोध र्‍यालीका वक्ताहरूले क्रिस्चियन बालिकाहरूको अपहरण र जबरजस्ती विवाहको बढ्दो क्रमप्रति चिन्ता व्यक्त गरेका थिए । उनीहरूले राष्ट्रपति र प्रधानमन्त्रीलाई यस विषयमा तत्काल ध्यान दिन आग्रह गरेका छन् । मानवअधिकारकर्मी गजाला शफिकले अदालतको फैसलाले देशको बाल विवाह विरुद्धको कानुनलाई कुल्चिएको बताइन् । कानुनी रूपमा पहिचान पत्र समेत बनाउन नसक्ने नाबालिकले धर्म वा विवाहको निर्णय कसरी लिन सक्छन् भन्दै उनले प्रश्न गरिन् ।

बालिकाहरूले १८ वर्ष मुनिको विवाह रोक्ने कानुन कार्यान्वयन गर्न माग गर्दै प्लेकार्ड बोकेका थिए। कानुनी सुधार र न्यायिक पुनरावलोकन बिना युवा बालिकाहरू सधैं जोखिममा रहने प्रदर्शनकारीको भनाइ छ । उनीहरूले सबै धार्मिक समुदायको साझा सहयोग र अल्पसंख्यकको समान सुरक्षामा जोड दिए ।