काठमाडौं – इन्डियन प्रिमियर लिग (आईपीएल) अन्तर्गत आठौँ खेलमा दिल्ली क्यापिटल्सले ५ पटकको च्याम्पियन मुम्बई इन्डियन्सलाई ६ विकेटले पराजित गरेको छ । यो जितसँगै दिल्लीले प्रतियोगितामा लगातार दोस्रो सफलता हात पारेको हो।

अरूण जेट्ली रंगशालामा शनिबार भएको खेलमा टस जितेर पहिले बलिङ रोजेको दिल्लीले मुम्बईलाई २० ओभरमा ६ विकेट गुमाएर १६२ रनमा सीमित गर्‍यो । जवाफमा १६३ रनको लक्ष्य दिल्लीले १८ दशमलव १ ओभरमा ४ विकेट गुमाउँदै पूरा गर्‍यो ।

दिल्लीको जितमा इम्प्याक्ट खेलाडी समीर रिजवीले उत्कृष्ट प्रदर्शन गर्दै ५१ बलमा ९० रन बनाए। यो उनको यस सिजनको लगातार दोस्रो अर्धशतक हो। साथै पाथुम निसांकाले ४४ रन र डेविड मिलरले अविजित २१ रनको योगदान दिए।

मुम्बईका लागि दीपक चाहर, कर्बिन बोस र मिचेल स्यान्टनरले समान १–१ विकेट लिए। नीतीश राणालाई जसप्रित बुमराहले रनआउट गराए ।

यसअघि ब्याटिङ गरेको मुम्बईका लागि सूर्यकुमार यादवले ५१ रनको अर्धशतक बनाए। त्यस्तै रोहित शर्माले ३५, नमन धीरले २८ तथा स्यान्टनरले अविजित १८ रन जोडे।

दिल्लीका लागि मुकेश कुमारले २ विकेट लिए भने अक्षर पटेल, लुंगी एनगिडी, विपराज निगम र टी नटराजनले समान १–१ विकेट हात पारे।

मुम्बईका नियमित कप्तान हार्दिक पाण्ड्या भने यस खेलमा सहभागी भएनन्। टसका क्रममा सूर्यकुमार यादवले उनी पूर्ण रूपमा फिट नभएकाले आफूले टोलीको कप्तानी सम्हालेको जानकारी दिएका थिए।