चितवन– चितवनको भरतपुर महानगरपालिका–१ आँपटारीचोकमा तीन वटा सवारीसाधन एकआपसमा ठोक्किँदा १५ जना घाइते भएका छन्।

जिल्ला प्रहरी कार्यालयका अनुसार मुग्लिनबाट नारायणगढतर्फ आउँदै गरेको ग१ख ९९२५ नम्बरको बस र विपरीत दिशाबाट जाँदै गरेको लु१च ८५५२ नम्बरको बोलेरो एकआपसमा ठोक्किएका थिए। सोही क्रममा पछाडिबाट आइरहेको बा प्र. ०३–००१ ह २५४८ नम्बरको अटो पनि बोलेरोमा ठोक्किएको थियो।

प्रहरी नायब उपरीक्षक रवीन्द्र खनालका अनुसार घाइतेमध्ये १४ जना बसमा सवार रहेका छन् भने एक जना अटो चालक रहेका छन्।

घाइतेमध्ये सात जनाको भरतपुर अस्पताल, चार जनाको चितवन मेडिकल कलेज र चार जनाको नेस्नल सिटी अस्पतालमा उपचार भइरहेको छ। प्रहरीका अनुसार सबै घाइतेको अवस्था सामान्य रहेको छ।