काठमाडौं– नेपाली कांग्रेसका नेता डा. शेखर कोइरालाले पार्टीभित्र आफू कुनै पनि गुट वा समूहमा नरहेको स्पष्ट पारेका छन्।

शनिबार काठमाडौंमा आयोजित विपी स्मृति सामुदायिक सहकारी अस्पतालको वार्षिक साधारण सभामा बोल्दै उनले हाल आफूलाई संस्थापनइतर समूहसँग जोडेर भइरहेको प्रचारप्रति आपत्ति जनाए। सामाजिक सञ्जालमा आफूलाई विभिन्न पक्षसँग जोडेर प्रस्तुत गरिएको भन्दै उनले त्यो भ्रम छरिएको बताए।

कोइरालाले आफ्नो मुख्य उद्देश्य नेपाली कांग्रेसलाई एकढिक्का बनाउनु रहेको उल्लेख गर्दै त्यसका लागि अन्तिमसम्म प्रयास गर्ने प्रतिबद्धता व्यक्त गरे। पार्टीलाई एकताबद्ध बनाएर आगामी निर्वाचनमा पहिलो राजनीतिक शक्तिको रूपमा स्थापित गर्ने आफ्नो चाहना रहेको उनले बताए।

उनले भने, ‘नेपाली कांग्रेसलाई एकढिक्का बनाउन र एक ठाउँमा ल्याउन म अन्त्यसम्म प्रयास गर्छु। म कुनै पनि समूहमा छैन।’

कार्यक्रममा उनले विपी कोइरालाको नाममा स्थापना भएको अस्पताललाई प्रभावकारी रूपमा सञ्चालन गर्न अवकाश प्राप्त चिकित्सकहरूको महत्वपूर्ण भूमिका रहन सक्ने धारणा पनि व्यक्त गरे।