काठमाडौं– बिहीबार हुने प्रतिनिधिसभा सदस्य निर्वाचनका लागि ललितपुरको क्षेत्र नम्बर ३ स्थित जावलाखेलको मतदान केन्द्रलाई महिलामैत्री बनाइएको छ । 

ललितपुर महानगर वडा नम्बर ४ को जावलाखेलस्थीत मतदान केन्द्रमा मतदान अधिकृतदेखि सहयोगीसम्म सबै कर्मचारी महिला रहेका छन् । त्यस्तै सुरक्षाकर्मी समेत महिलाहरू नै रहेको निर्वाचन अधिकारी उपसचिव नमुना कार्की दाहालले जानकारी दिइन् । 

जावलाखेलस्थीत मतदान स्थलमा रहेको ६ वटै मतदान केन्द्रमा सबै महिला कर्मचारीहरूले नै व्यवस्थापन गरिरहेको उनले बताइन् । 

उनले बिहीबार हुने निर्वाचनका लागि सबै तयारी पुरा भएको र अन्य आवश्यक समन्वय समेत भइरहेको उल्लेख गरिन् । बिहीबार पाँच बजेसम्म शान्तिपूर्ण रुपमा मतदान सम्पन्न गर्ने उद्देश्यका साथ आफूहरूलाई लागिपरेको उनको भनाइ छ । 

उनले महिलामैत्री मतदान स्थलमा कुनै चुनौती नदेखिएको र अनुकूल रुपमा नै तयारी भइरहेको बताइन् ।