काठमाडौं– संयुक्त अमेरिकी–इजरायली हवाई आक्रमणमा इरानका सर्वोच्च नेता अयातोल्लाह अली खामेनीको मृत्यु भएपछि उनका छोरा मोज्तबा होसेनी खामेनीलाई नयाँ सर्वोच्च नेताका रूपमा चयन गरिएको छ।

इजरायली मिडियाका अनुसार इरानको एसेम्बली अब एक्सपर्टले मोज्तबालाई खामेनीको उत्तराधिकारीका रूपमा चयन गरेको हो।

गत फेब्रुअरी २८ मा भएको संयुक्त आक्रमणमा खामेनी आफ्नै निवास क्षेत्रमा रहँदा मारिएको बताइएको छ। आक्रमणमा उनकी छोरी, ज्वाइँ र नातिनीको पनि ज्यान गएको थियो। उनकी पत्नी मन्सुरेह खोझास्तेह बाघेरजादेह घाइते भएपछि उपचारका क्रममा निधन भएको समाचारमा उल्लेख छ।

खामेनीको अन्त्येष्‍टि मशादमा गरिने र तेहरानमा ठूलो श्रद्धाञ्जली सभा आयोजना गरिने जनाइएको छ। यद्यपि अन्त्येष्टिको मिति सार्वजनिक गरिएको छैन।

खामेनीले औपचारिक रूपमा उत्तराधिकारी तोकेका थिएनन्। यसअघि अन्तरिम रूपमा आयातोल्लाह अलिरेजा अराफी, राष्ट्रपति मसुद पेजेशकियन र प्रधानन्यायाधीश घोलामहोस्सेन मोहसेनी एजाइ सम्मिलित तीन सदस्यीय नेतृत्व परिषद्ले सर्वोच्च नेताको जिम्मेवारी सम्हाल्दै आएको थियो।