काठमाडौँ – वसन्त ऋतुको आगमनसँगै यतिबेला काठमाडौँका विभिन्न स्थानमा चेरी फुल्न थालेका छन् । लैनचौर, सिनामङ्गल र भृकुटीमण्डप क्षेत्रका सडक किनारा तथा पार्कमा फुलेका चेरीले सहरको सुन्दरतामा थप निखार ल्याएको छ ।

पछिल्लो समय सहरी सौन्दर्यीकरणका लागि काठमाडौँ महानगरपालिकाले आफ्नो क्षेत्रभित्रका विभिन्न सडक किनारा र सार्वजनिक उद्यानमा चेरीका बिरुवा रोपेको थियो । ती बिरुवाहरू छिप्पिएर फुल्न थालेपछि राजधानीको स्वरूप नै बदलिएको छ ।

चेरी फुल्न थालेसँगै सर्वसाधारणहरूको पनि ती स्थानमा भिड लाग्न थालेको छ । विशेषगरी युवायुवतीहरू फूलसँगै तस्बिर लिने र सेल्फी खिच्नमा व्यस्त देखिन्छन् ।

जापानको राष्ट्रिय फूलका रूपमा समेत परिचित चेरीले यतिबेला काठमाडौँलाई गुलाबी रङमा सजाउने काम गरिरहेको छ ।

तस्बिर : नेपाल फोटो लाइब्रेरी