इरान- अमेरिकास्थित मानव अधिकारवादी समाचार एजेन्सी (एचआरएएनए)ले इरानमा एक हजार बढीको मृत्यु भएको रिपोर्ट सार्वजनिक गरेको छ । एचआरएएनएका अनुसार इरानमा ६ दिनमा एक हजार ९७ जना सर्वसाधारणको मृत्यु भएको हो।

मृतकमध्ये १८१ जना १० वर्षमुनिका बालबालिका रहेको उक्त एजेन्सीले जनाएको छ।

एचआरएएनएका अनुसार घाइते हुने नागरिकको सङ्ख्या ५ हजार ४०२ पुगेको छ । घाइतेमध्ये सय भन्दा बढी बालबालिका छन्।

पछिल्लो २४ घण्टामा मात्रै कम्तीमा १०४ वटा आक्रमण भएका छन्। यी आक्रमण सैन्य अखडा, चिकित्सा केन्द्र र आवासीय क्षेत्रहरूमा लक्षित रहेको एजेन्सीले उल्लेख गरेको छ।

अमेरिकी राष्ट्रपति डोनाल्ड ट्रम्पले इरानले पहिले आक्रमण गर्ने तयारी गरेको सूचना पाएपछि इजरायलसँग मिलेर प्रतिकारको आदेश दिएको बताएका छन्।

इरानले इजरायल र अमेरिकी सैन्य अखडामा जवाफी हमला जारी राखेको छ, जसमा दुबईस्थित अमेरिकी दूतावास र फुजैराह बन्दरगाहमा आक्रमण भएका छन्।

इरानले विश्वको महत्त्वपूर्ण तेल मार्ग ‘हर्मुज स्ट्रेट’ बन्द गर्ने घोषणा गरेपछि यसले विश्वव्यापी तेल आपूर्तिमा सङ्कट पैदा हुने देखिएको छ ।

मध्यपूर्व अर्थात् खाडी क्षेत्रमा युद्धले तनाव बढ्दा त्यसको असरमा नेपालमासमेत देखिएको छ । खाली राष्ट्रमा मात्र करिब १८ लाख नेपाली रहेकाले मध्यपूर्वको तनाव नेपालीका घरघरमा पुगेको हो ।