अछाम – नेपाली कम्युनिस्ट पार्टी (नेकपा) का तर्फबाट अछाम निर्वाचन क्षेत्र नं. १ का उम्मेदवारका प्रतिनिधि बालगिरी कुँवरले आचारसंहिता उल्लंघन गरेको भन्दै एमाले उम्मेदवार दीपक साउदविरुद्ध जिल्ला प्रशासन कार्यालयमा उजुरी दिएका छन् ।

फागुन १९ गते प्रमुख जिल्ला अधिकारीलाई सम्बोधन गरी दर्ता गरिएको पत्रमा नेकपा (एमाले) का उम्मेदवार साउदले मौन अवधिको उल्लंघन गरी चुनावी प्रचारप्रसार र मतदातालाई प्रलोभन देखाउने कार्य गरेको दाबी गरिएको छ ।

विज्ञप्तिअनुसार निर्वाचन कानुन र आचारसंहिता बमोजिम फागुन १८ गते राति १२ बजेदेखि नै कुनै पनि किसिमको प्रचारप्रसार गर्न नपाइने व्यवस्था छ । तर, एमाले उम्मेदवार साउदले फागुन १९ गते बिहानदेखि दुईवटा गाडीमा कार्यकर्तासहित मेल्लेख गाउँपालिका–७ (नन्देगडा र मौभेरी) तथा बान्नीगढी जयगढ गाउँपालिका–३ (धारासैन) मा प्रचारप्रसार र कोठे बैठक गरिरहेको आरोप लगाइएको छ ।

विज्ञप्तिमा भनिएको छ, “उम्मेदवार दीपक साउदले आफ्नै नेतृत्वमा मतदातालाई विभिन्न प्रलोभन दिइरहेको पाइएको छ । यस सम्बन्धमा यसअघि नै मौखिक रूपमा प्रमुख जिल्ला अधिकारी र निर्वाचन क्षेत्र नं. १ का निर्वाचन अधिकृतलाई जानकारी गराइसकेका छौँ ।”

उजुरीकर्ताले आचारसंहिताको ठाडो उल्लंघन गर्ने उम्मेदवार साउद र संलग्न कार्यकर्तालाई तत्काल कानुनी कारबाही गर्न र यस्ता गैरकानुनी कार्य रोक्न माग गरेका छन् ।

मौन अवधिमा हुने यस्ता क्रियाकलापले निष्पक्ष, स्वतन्त्र र धाँधलीरहित निर्वाचन सम्पन्न गर्ने लोकतान्त्रिक विधिमा प्रतिकूल प्रभाव पार्ने र समाजमा तनाव उत्पन्न हुन सक्ने भन्दै प्रशासनको ध्यानाकर्षण गराइएको छ ।