न्यूयोर्क- भेनेजुएलाका राष्ट्रपति निकोलस मादुरोलाई न्यूयोर्क सिटीको मेट्रोपोलिटन डिटेन्सन सेन्टर (एमडीसी) जेलमा सारिएको छ।

विलासी जीवन बिताउँदै आएका मादुरोका लागि यो जेलमा बिल्कुलै विपरीत वातावरण भएको बताइएको छ।

एमडीसी अमेरिकाका सबैभन्दा खराब जेलहरूमध्ये एक मानिन्छ। धेरैले यस जेललाई अत्यन्तै फोहोर र डर लाग्दो भनेर वर्णन गरेका छन्। यहाँ कर्मचारीको ठूलो अभाव छ।

कैदीहरूबीच हिंसा सामान्य छ । विद्युत अवरुद्ध हुनु पनि यहाँको बारम्बारको समस्या हो। यो जेल सन् १९९० को दशकमा जेलको भीड घटाउन बनाइएको थियो।

यसअघि यहाँ गायक आर केली, औषधि व्यापारी मार्टिन श्रेकली, घिसलेन म्याक्सवेल, क्रिप्टो व्यापारी स्याम बैंकम्यान–फ्राइड र संगीत उद्योगका दिग्गज सीन ‘डिडी’ कोम्ब्स जस्ता उच्च–प्रोफाइल कैदी राखिएका थिए।

कुख्यात लागु औषध कारोबारका नेता इस्माइल ‘एल मायो’ जाम्बादा गार्सियालाई पनि यहीँ राखिएको थियो।

यो जेलभित्र हिंसाको जोखिम सधैं रहन्छ। सन् २०२४ को जुनमा एक कैदीको चक्कु प्रहारबाट हत्या भयो । त्यसको एक महिनापछि झगडामा अर्का एक कैदीको मृत्यु भएको थियो।

सन् २०१९ मा जेलमा ठूलो विद्युत संकट पनि आएको थियो। करिब एक हप्ता कैदीहरू चिसो र अन्धकारमा बस्न बाध्य भएका थिए।

यहाँका शौचालयहरू पनि सधैं प्रयोग गर्नलायक रहँदैनन् । कैदीहरूलाई धेरै दिनसम्म सेलबाट बाहिर निस्कन दिने गरिएको छैन ।

उता अमेरिकी आक्रमणमा भेनेजुएलाको सबैभन्दा ठूलो सैन्य बेस फुएर्ते टियुना ध्वस्त भएको छ। यहीँबाट शनिबार मादुरो र उनकी पत्नी पक्राउ परेका थिए।